小初真係唔明，點解家陣啲炒家，無論大細或者中外，都鍾意將好消息當壞消息炒，好似小初早幾日提過，同仁堂科技（8069）貨疏兼可炒業績，公司業績絕對冇令人失望，全年賺成1.47億元，較去年多咗近48%，兼且有息派，但股價噚日大跌9.2%，收10.35元。
經紀黃話，同仁堂街貨集中在少數基金手上，貨疏有個好處就係容易將股價舞起；另一方面，佢哋一旦計數離場，沽壓之大亦絕對唔講得笑，呢類風險其實大家要一早預咗。
另外，早排供完股嘅威華達（622），由於供股唔足額，令大股東百仕達（1168）持股量大幅增加。噚日隻股失驚無神升咗35.3%，收0.023元。但經紀陳勸小初，隻股好似冇特別消息，唔好亂上車。
威華達早在仍然叫銀網嘅年代，據聞已有班炒家坐咗好大手貨，上次供股，有人二仔底死跟溝淡，所以今次反彈，唔排除只係乾炒，可能冇古仔跟尾。
慕容小初