秘書小姐睇咗上星期六本欄講《日本人市場》，對左丁山話：「波士你記錯咗嘞，日本會會費只係每個月三百四十蚊，唔係近一千蚊。FCC就每月交九百五十五，五陵會每個月畀九百，你搞亂咗噃！」唉吔，全部都係白交會費，自己甚少去會所食飯，要檢討吓，剩番啲錢嚟交稅至得。
讀者反應快速，一位YT君即刻來電郵：「我只須交會費三百四十元，你應該向日本人查詢。」多謝提醒，錯嘅係左丁山自己，唔使查詢咯。
上星期五（三月七日）本欄批評「一群地球人」嘅反戰宣言，中英文都寫得唔好。一位讀者署名「其中一個地球人」來電郵話：「小弟乃支持反戰之其中一個地球人，其實本人只是一個普通香港市民，在公司是一個小職員……我付出幾十元以支持反戰，這個廣告最後就這樣刊登了……希望你能深入了解我們當中要表達的意思，請不要着重文法的對錯與好壞，我相信一個懂中文或英文的人士都會明白我們反戰的意思……」
呢篇「反戰宣言」嘅中英文，俾陶傑在《明報》（三月六日、三月七日）痛批兩日，事實上確係寫得唔好，號召反戰，全靠宣傳，以文字口號激動人心，寫得唔好，反戰也無力。剛好同日收到PerryLam（林沛理）君嘅電郵，原來佢就係English,Stones&Glasshouses一文嘅作者，林君話希望更多人關注香港嘅英文寫作水平，一群地球人，以後再出廣告大可搵林君指教！