國際足協會長白禮達出嚟鬧利華古遜喺禮拜二作客輸畀巴塞隆拿○比二場歐冠盃夢遊球場；但我求大俠就覺得佢要怪就怪個賽制，利華古遜出線無望，重同你搏命咩！
歐洲足協為咗賺多啲錢，喺九九/○○球季將參加隊數由二十四隊增至三十二隊，重增添次圈分組賽。打分組賽嘅唔好處，就係當球隊知道自己出硬線或出硬局，就會喺餘下一、兩場玩嘢，賽事可觀性亦受影響。
利華古遜喺對巴塞之前都肯定出局，加上佢哋喺德甲聯又受到降班威脅，所以唔盡力比賽都係可以理解。至於篤定以首名出線嘅曼聯同AC米蘭，咪亦好似利華古遜咁排弱陣同唔盡力比賽。話時話，歐冠盃喺○四/○五球季開始取消次圈分組賽，用番兩回合淘汰制，到時球迷就少睇到啲無無謂謂嘅比賽。
意大利前鋒近排唔知行乜嘢衰運，頭頭碰着黑。雖然我求大俠都認同托迪係因基昂詐死搞到被罰出場，但因歐洲足協會喺呢個月二十一號先開紀律聆訊，所以羅馬到時先可上訴，咁即係托迪肯定踢唔到下周三對阿積士場歐冠盃。國米前鋒韋利涉嫌種族歧視紐卡素嘅路亞，亦面臨歐洲足協紀律處分。
足球除亞洲盤過癮外，過關亦好多人玩，主要因為本少利大，據英國博彩公司威廉希爾講，有個球迷就以星期二、三嘅歐洲賽事其中五場用嚟玩過關，重係買「半/全場」過關㖭！點知頭四關都中咗，就係差最尾雷丁對狼隊呢關唔中，結果只贏得四十萬鎊（約四百八十萬港元），如果全中有七十萬鎊㗎！
列當度冇錯係個好好波嘅球員，但係腳頭似乎就唔係幾好。我求大俠記憶所及AC米蘭如果有佢助陣，贏波唔多，通常都輸波收場多。之但係，佢之前養傷咗成年幾兩年，最近先啱啱復出比賽，可能狀態重未操番起，無論點，據講佢離場時，有好多皇馬球迷起立拍掌向佢致敬，證明佢喺皇馬球迷心目中重有啲地位。
日本嘅J聯賽一向被視為全亞洲最強嘅聯賽，加上日本國家隊喺夏天嘅世界盃又表現唔錯，自然令人期望J聯賽球隊喺第一屆亞洲足球冠軍盃聯賽有好表現，點知兩支代表清水同鹿島喺星期三輸波後，已肯定出局。咁究竟係其他亞洲國家水準升咗？抑或日本其實唔係咁勁呢？