噚日郵政署發行「傳統行業與民間工藝」新郵票，一共六款，內容包括代寫書信、製造雀籠、縫製旗袍、梳頭美髮、搓麵粉公仔同賣飛機欖。
佢哋噚日特別請人去表演整麵粉公仔，又請咗賣飛機欖二十幾年嘅李慶雄助興。佢話以前喺深水埗同北角等地拋飛機欖，一蚊有三粒，好多小朋友特登跑到七樓先叫佢拋，講嘅時候都不知幾緬懷。不過兩、三年前佢決定收山，皆因經濟唔好，大人難搵錢，搞到連啲小朋友都話冇錢喎。李生又話，以前一日賣得二十幾蚊，𠵱家幫啲團體同晚宴做吓展覽，重好搵！
李慶雄嘅出現，謀殺咗記者同八方唔少菲林，個個都叫佢不停擺甫士同掟飛機欖，佢就笑到見牙唔見眼話：「我結婚都冇影咁多相呀！」
（圖）李慶雄噚日喺郵政署大派飛機欖，宣傳發行有關傳統行業嘅郵票。 徐岱靈攝
傳真︰2623-9278
電郵︰