打工仔最擔心冇工開，但有錢人嘅煩惱就複雜得多，噚日喺立法會自認有錢人嘅議員，話有錢佬多數孤寒；唔認有錢嘅，就考慮花六百萬，買二十一世紀最豪嘅平治轎車Maybach（讀「咪白」）。
自由黨黨魁田北俊唔怕影響形象，同記者講「你知啦，好多有錢佬都好孤寒，好似我，有錢㗎，身份象徵（馬時亨局長話齋：擁有名車等於身份象徵）？不嬲已經有，加稅咪唔換住囉！等五、六年先換？天都光啦，點幫到財赤呀！」
另一邊廂，東亞主席李國寶死口唔認係有錢人，重擺誠哥上枱話：「李嘉誠先係有錢人。」
不過轉個頭，寶Baby又話年尾可能買架平治最新嘅轎車Maybach，架車未加稅已經要四百萬，𠵱家可能去到六百萬。寶Baby講新車時嘅表情好似就快有新玩具咁興奮，話已經去過德國試車，想要乜嘢顏色車廠都會幫佢做，重承諾買咗車請記者坐：「呢架係全世界最靚嘅車！」Benz真係要請佢做大PR。
平治公關小姐同八方講，呢款車分Maybach57及Maybach62兩個型號，分別車長5.7及6.2米，每日限量生產五部，香港有唔少人落定，新車最快年中抵港。加稅後定價𠵱家未有，佢哋重同德國總公司傾緊。有消息話，售價未必加到六百萬咁多，對寶Baby肯定係大喜訊，雖然佢多多都畀得起。
傳真︰2623-9278
電郵︰