韋利不嬲都係我求大俠欣賞嘅前鋒之一，估唔到佢前晚喺歐聯對紐記時因為不滿球證判決，一怒之下踢走個波，食咗黃牌之後下輪要停賽。佢呢次表現得咁唔成熟，我對佢嘅印象即刻打晒折扣囉。
我求大俠都喺波地長大，好明白韋利喺前線孤軍作戰好辛苦，躁火就難免。之但係小不忍則亂大謀，佢冇理由唔考慮球隊狀況而咁唔理智。國米鬧前鋒荒，𠵱家又加埋韋利停賽，下輪對利華古遜局住靠𡃁仔馬田斯擔大旗，唔可以太樂觀。
韋利唔理智，托迪就唔得醒。呢位羅馬王子拍中基昂被趕出場，衰在之前轉過頭望向基昂，個勢好似有心批踭咁，再加埋基昂咁好演技，電光石火間影響球證判決真係唔奇，怨就怨托迪個動作太大啦。
紐記俾國米迫和，要出線下場就要主場贏巴塞之餘，重要靠利華古遜令國米失分。紐記領隊卜比笠臣賽後就打定輸數，話睇死利華古遜幫唔到佢哋咁話喎。
我求大俠認識老笠臣咁多年，知佢不嬲善於出口術，佢咁講擺明想刺激利華古遜球員鬥心，即管睇吓佢呢招有冇效嘞。
上個禮拜我哋體育版至報道過阿仙奴前鋒簡奴點樣弘仁愛顯愛心，佢搞嘅簡奴心臟基金搞到有聲有色，而佢最近忙於四出呼籲人捐錢同埋聯絡球隊進行慈善賽。行善積德係好，但佢老哥都要顧吓自己球員身份至得㗎。好似前晚對羅馬佢落場一陣都唔知踢咩，啱啱公布嘅尼日利亞國家隊大軍名單又冇佢份，奉勸佢投入番多啲喺球賽好喎。
講番阿仙奴對羅馬，估唔到兵工廠咁長時間以眾凌寡都贏唔到，如果唔係蒙迪拿完場前近門頂唔入，阿仙奴甚至主場喪師㖭。羅馬教頭卡比路賽後話就話諒解蒙迪拿，言語間卻又話自己都做過球員，咁嘅波好難唔入咁講，擺明有啲埋怨嘅意思。呢場波蒙迪拿就樣衰衰，隊友卡斯辛奴就入波，睇怕蒙迪拿都難有前途。
喺佐敦發晒「老脾」後，班巫師嘅後生仔噚日終於交足功課，打冧咗魔術。就連魔術教練李華士都話同之前打紐約人嘅巫師比起上嚟，直情好似兩班波咁。梗係啦，上次佐敦打完紐約人場波之後講到明，下年會炒咗啲冇鬥心、打到死蛇爛蟮咁嘅球員；班細嘅聽到之後重唔識驚咩，為保飯碗自然個個都搏晒命啦！