嘉里建設為大埔滌濤山花園洋房，搞花園設計大師賽，揀咗六家行內知名嘅園藝設計公司，為六間複式單位花園大裝身。
蘭西噚日有幸率先一睹大師級傑作，每個花園各有主題，濃妝、淡抹，各擅勝場。好似主題「日本和風」的七十八號室，入到去成個人好似去咗一個清靜境界，時間喺呢一刻凝住咁樣。又例如七十七號流水噴泉嘅靈動，合時花卉與洋房外牆色調相配，帶出「悠悠自得」的意境。其他嘅設計主題包括「藝海拾貝」、「歐陸情懷」、「綠意盈盈」同「南粵風情」，都各有特色。
嘉里物業代理執行董事朱葉培話，賽果五月公布，除請三位大師嚟評分外，參觀人士同記者都可畀分。估中冠軍嘅評分者可得到酒店雙人自助餐券。下月三十日前購買花園洋房，可獲贈價值十幾二十萬嘅花園設計同一年保養。
將於本月底收樓嘅愉景灣海澄湖畔二段，聽講租市都唔錯，特別受外籍客歡迎，好似啱啱租出嘅兩個低座單位，租客都係外國人，一名係飛機師，另一位係意大利商人。租出嘅地下連花園，面積一千六百二十八方呎四房單位，月租三萬七，呎租二十二個七，另一樓A單位，一千三百七十八方呎，月租二萬一，每呎十五個二，個價都唔錯，租金回報率有五厘幾。
美聯舊年12月搞咗個「美聯30周年逍遙大抽獎」，中獎者可獲「雙人十日七夜加勒比海郵輪之旅」，到上個月已經圓滿結束，上個禮拜五抽獎，由黃建業親自主持，得獎者住喺荔枝角美孚新邨，透過美聯租用咗附近一層工廈，月租不過八千二，以行規最多收一個月租金做佣金計算，個客付出八千二蚊代價就換嚟價值三萬銀嘅遊埠機會。原來呢個世界真係有人特別有抽獎運嘅。
香港經濟持續疲弱，搵錢唔容易，普羅大眾使多個錢都要諗清楚先。唔少物價已經跟隨大市下跌，樓價不在話下，連管理費都要減。好似減價清貨嘅西半山寶翠園，早排好低調咁減管理費。今個月各戶嘅管理費由之前每呎個九，減到個六，雖然話係減咗區區三毫子，但小數怕長計，今時今日，慳得就慳。
寶翠園共六座，二千二百多伙。聽代理講，現時入住率有八成，即係有成一千七百幾戶搬咗入去，因為業主多咗，可攤薄管理費喎。
番禺祈福新邨發展十幾年至今，已成配套完整嘅住宅小區，舊年重開埋酒店式醫院，蘭西參觀過，設施頗先進，拍得住香港，一啲都唔輸蝕，而且無消毒藥水味，似行酒店商場多過入醫院。番禺祈福新邨房地產有限公司董事總經理彭磷基，近期獲選為政協第十屆全國委員，佢話雖然要兼顧政協委員職務，但仍然會盡力做好公司本份。
蘭西
電郵地址：
