市道已經麻麻，財爺重要話加稅，好多人都大歎搵食艱難，不過喺中、上環返工嘅Simpson同CoCo就唔同咁睇，事關午市時段，中、上環呢啲寫字樓區，周圍都係大爭生意嘅$10餐！厚身燒鵝瀨、大粒雲吞麵、台式麵食、每日出爐蛋糕糖水，品種款式真係多到眼都花，搵食有幾難啫?!
記者：朱崇德
攝影：陳盛辰、陳智良
聽金龍老闆何榮銳先生表示，燒臘食物質素高而價錢又㩒得咁低，主要係因為有自己嘅工場，品質亦較易操控，再加上近年鵝一類嘅家禽，大多舖頭亦已改用冰鮮，來貨成本比以前平了，所以$10餐真係大有空間！
喺中環返工嘅Simpson，佢嘅至正$10餐搵食推介，首選係金龍嘅老牌燒鵝瀨，「喺中環返工又識食嘅人，多數都知喺每日嘅下晝兩點至六點，呢度都會有$10燒鵝瀨；最正係佢用真燒鵝，唔似一啲舖頭用燒鴨扮！如果可以三點上去就更好，因為係佢哋下晝嘅出爐時間，新鮮厚切嘅燒鵝，再加上咬落去時燙口嘅肉汁，絕對係最超值嘅$10餐！」
聽何老闆講，原來其次出名嘅佢哋嘅酬神燒豬同乳豬，附近好多大公司，好似華商會、賽馬會，以至好多銀行飯堂同會所，都係嚟問佢攞燒肉乳豬！
名副其實唔係用鴨扮嘅真燒鵝！而係出奇地厚身多汁，$10真係抵到爛！
同第一代創辦人何伯已經成廿幾三十年街坊，基本上中西區所有社區活動要買燒豬，都一定會落金龍買！
金龍燒臘小食飯店
地址：中環結志街48號地下
電話：25438675
如果問全個中、上環區邊間$10食店條長龍最長？中環麗人CoCo可以好肯定話你知一定係沾仔記！單以最旺場嘅中午十二點至下晝兩點，堂食加外賣最高可以賣到2,000碗雲吞麵，真係唔講得笑！
呢間老牌雲吞麵店已經經歷咗三代兼有30年歷史，論最出名食品，當然係乒乓波咁大嘅雲吞麵啦！雖然麵價下調至$10，但沒有將貨就價，據老闆楊子勤先生謂：「做雲吞最緊要嘅係蝦！所以我哋一直都係用最新鮮嘅大蝦！雖然賣嘅量多咗，但成本實在太貴，真係只求一句薄利多銷！」
用正大地魚、豬肉及鮮蝦包，而且粒粒十足乒乓波咁大，絕對貨真價實！
雲吞麵餐真係出得好快，價錢OK，啲嘢食都好正，不過最緊要係地方夠乾淨衞生！
沾仔記麵食
地址：中環干諾道中61號地下
電話：25813369
記者喺上環一間麵店結識了店長Peter，細談間，竟然發現佢曾經係一間運輸公司嘅總裁！不過，自2000年看見香港運輸業市道不景，連自己百幾萬嘅積蓄都用盡嘅情況下，喺中環開咗一間聯辦形式嘅麵店。同一般剛創業人一樣，起初喺冇乜流動資金情況下開業，回想都手心一把汗！不過推出的$10台式及上海麵（只限下晝二至六）後好受歡迎，所以開創出另一個生存空間。
台式肉燥湯麵（下）
口感好似意大利的Pasta，而中、上環區特別多外國人，相對廣東的梘水麵，這兩款大碗麵自然較易接受。
下晝二至六真係幾旺場，而且好多時鄰枱都係外國人！
麵軒‧小歇
地址：上環德輔道中262號
電話：25438621
其他飽肚$10餐
福滿源
地址：中環士丹利街21號地下
電話：29730830
金華燒臘麵家
地址：中環租庇利街9號
電話：25451472
文輝墨魚丸大王
地址：上環德輔道中243-245號地下
電話：25438468
一樂食館
地址：中環士丹利街28號地下
電話：25243882
鳴謝：Simpson、CoCo（新星堡娛樂製作有限公司）