經紀K認為記者寫「水盡鵝飛」，實乃「水靜河飛」之誤，左丁山初步贊同，因為自細聽到大，老竇教落都係「水靜河飛」，冇聽過「水盡鵝飛」也。星期日見到幾位老人家，都捉住佢哋問一問，幾位老人家都好明確咁話：「梗係『水靜河飛』啦，講咗幾十年咯，未曾聽過水盡鵝飛嘅！」
但星期日睇《蘋果》（A10版新車改配件），又見到「但不少車行都水盡鵝飛」，唔通編輯知道啲我哋唔知嘅嘢？諗諗吓，忍唔住上網搵資料，喺一個名為「字虱大觀園」（撰文：浪者）內搵到「水靜河飛」一條，內云：「水靜河飛」乃香港人常用俗語，形容空無一人，悄然無聲。這俗語出自明．王磐《朝天子．詠喇叭》：「眼見的吹翻了這家，吹傷了那家，只吹得水淨鵝飛罷。」，本地人把「水淨」誤為「水靜」，把「鵝飛」訛為「河飛」，水靜尚可理解，河飛則叫人抓破頭腦也不知何解。
此說幾有理由，左丁山從來都唔明白「河」點解會「飛」嘅，如果話「水淨鵝飛」，就非常貼切。但點解𠵱家啲記者編輯又會將「水靜河飛」變成「水盡鵝飛」呢，唔多明噃，各位讀者對俗語有研究嘅，請來函多多指點；譬如話，「水盡鵝飛」又語出何典呀？
講咗咁多年俗語，𠵱家先知道好多嘢我哋係不求甚解嘅，只係人云亦云，慚愧之至。