真係難明，家陣主板細價股已經唔易炒起，估唔到重有人得閒走去炒創業板，想炒高創業板散貨，其實難度高好多。
舊年8月上市，曾炒過一輪嘅滙創控股（8202），早排傳出想再搵車手開車，但當時一來市靜，二來因為係創業板股，好多證券行都唔肯借孖展，所以一直都只聞樓梯響。經紀陳話，家陣生意難撈，證券行亦要轉軚，連創業板股亦要掂。
滙創噚日股價雖然冇乜異動，只係升咗3.23%，收0.64元，但成交就大咗好多，有成547萬元，睇嚟係開車嘅先兆。
經紀陳話，江湖傳聞滙創街貨主要由少數炒家持有，所以一直有人都想搵多幾個行家幫手。不過，就算炒家今次搵到幫手，小初亦唔敢亂上車。
另外，雖然嘉華國際（173）噚日因為港交所（388）准許賭業上市而急升，但暫時聽唔到大股東有將賭場注入嘉華嘅意圖，反而信德（242）成事機會大好多。
慕容小初