呢輪都可算係香港汽車業嘅多事之秋，雖然唔好嘅消息接連出現，但總算亦有好消息沖喜一下嘛！亞Mark所指嘅，係早幾日經已轉由皇冠車行接管嘅大發汽車，三間分布港九新界嘅陳列室正式投入運作嘅同時，重一如亞Mark早前所報，話佢哋會推出全新Move車系㖭！之不過，今勻受到財爺加稅影響，就如呢部迷你CityRV咁，660cc加Turbo嘅Custom版，都要賣過11萬有多，以迷你車而言就真係唔係咁便宜喇！睇嚟新代理都要花一番工夫，好等班準買家能夠接受增加汽車首次登記稅後，車價大幅飆升嘅事實。至於唔少車迷期待已久、兼且未正式面世嘅Copen開篷小車，相信大家仍需多等一會，但亞Mark預計都會係4月左右，就會跟香港車迷正式見面。