本報記者意大利一級方程式賽車場實地測試:<br>富豪S60R好玩到震!

本報記者意大利一級方程式賽車場實地測試:
富豪S60R好玩到震!

繼日前響意大利南部Bologna,實地測試過富豪最新嘅V70R之後,跟住落嚟就係到世界一級方程式賽車聞名嘅意大利AutodromoEnzoeDinoFerrari賽車場,以激情測試新款S60R房跑車嘅真正能耐;呢個曾經令世界頂級車手冼拿魂斷嘅賽車場,亦係一眾車手夢寐以求能夠揚名立萬嘅英雄地。究竟呢部S60R能否駕馭呢個蜿蜒多彎,兼且重要上坡下斜嘅賽道,筆者今趟委實遇到有生以來嘅最大考驗呢!

記者、攝影:陳偉林

尺碼適中切合房跑車身份
呢部賣相跟V70R酷似嘅S60R型號;根據廠方所提供嘅資料,車長、前後軸距、車高以至係淨重,都跟前者有所差別,造型明顯看來更切合一部高性能房跑車嘅身份,明亮得看來頗有神氣嘅頭燈、低斜嘅C柱接連特別設計嘅尾定翼,均予人留有深刻印象;其中,又以惡形惡相嘅氣霸,以及特大嘅18吋跑車合金胎軨至為吸引呢!

色調獨到設備一應俱全
今趟意大利之行,發覺廠方響兩部新車上,除有特別車身專色配搭外,座艙色調亦予人有耳目一新之感。正如S60R那般,鮮明色調配襯金屬裝飾,豪邁之中不失一份跑意,而前後兩排皮椅更以人體工學剪裁,乘坐貼身舒適又不失承托力;另外既有獨立頭枕、又有前後大型中央手枕,當然少不了電窗、電鏡、電天窗,以及高級音響連左右恒溫冷氣,重有多達八個充氣簾幕連安全氣袋組合㖭!

多套電子系統令信心大增
響賽道上馳騁,除卻新車有一定上佳性能演繹外,最講求還是四輪對地抓着力、懸掛及底盤穩紮性,同埋高效能耐熱嘅制動器。筆者發覺將S60R一套半主動式底盤模式設定響Sport時,走彎循迹性更柔韌富支持力;由於呢個車場有較多手臂彎嘅設定,故一套電子恒式四驅,匹配響2、3波嘅發揮至為適合不過。轉檔行程短而明確,加速力又見狠勁,每到達紅區前HardBraking及推落一檔的話,車體仍能朝着軚盤轉向疾走,惟表板旁不停有燈號閃動,相信車上嘅TRACS、DCC及DSTC等系統正忙個不停呢!

記者試後簡評
響世界一級方程式賽車場之一嘅意大利AutodromoEnzoeDinoFerrari,測試富豪最新S60R房跑車,簡直係一次興奮莫名嘅經歷,響蜿蜒多彎上山落斜嘅跑道上,新車發揮可謂淋漓盡致,恒式四輪驅動匹配最新4-C嘅Semi-active半主動底盤模式控制,拐彎循迹力予人有易於駕馭嘅觀感,每次接近Red-Zone下嘅HardBraking,由腳踏傳來嘅感應,亦沒有半點遲緩腳軟嘅反應呢!

富豪S60R規格
引擎:2521cc直5DOHCTurbo
馬力:300ps/5500rpm
扭力:40.8kgm/1950-5250rpm
傳動:6前速手波,恒式四驅
懸掛:(前)柱式獨立(後)多連桿
制動:(前)透氣碟(後)透氣碟(ABS)
輪胎:235/40ZR18PirelliPZeroRosso
尺碼:4606×1804×1430mm
軸距:2715mm;車重:1637kg
0-100公里:5.7秒
極速:250km/h(有限制)
平均耗油:10.5L/100km
新車售價:約港幣30萬起(未連稅)
查詢:太古汽車(29238080)