喺電影《失憶𠝹女王》入面，主角古天樂着咗件𠝹女戰衣，呢件戰衣嘅特徵係上身着西裝，下身着單車褲，意思即係話古仔上至OL、下至𡃁妹仔都一樣𠝹得掂。古仔話佢自己平日約女仔出街，會視乎對方嘅喜好而着唔同嘅衫，例如個女仔鍾意做運動，佢就會着運動衫。
至於喺戲入面嗰套𠝹女戰衣，就係專為女主角應采兒度身訂做嘅，原因係應采兒喺戲入面癲癲喪喪，一時調皮、一時斯文，所以呢套九唔搭八嘅𠝹女戰衣就最啱佢。古仔重教大家第一次約女仔出街，唔知對方嘅性格，就唔好着得太突出，最緊要畀人嘅感覺舒服同自然。
套戲下個月上，馮仁昭早兩日睇咗試片，本來諗住睇一場笑片，估唔到去到尾段都幾感人，係笑中有淚嗰隻，算係有啲驚喜。不過套戲開頭，就胡鬧咗些少。
許志安噚日喺港台出席活動，安仔同正東唱片就嚟約滿，而黃柏高自組嘅唱片公司有意搵佢簽約，佢話：「暫時未理呢啲嘢，考慮要好詳細，遲啲大家就會知。講心唔講金就呃你嘅，始終係商業社會，但淨係講金唔講心，又唔係我性格，不過最緊要唱好啲歌。」問到會唔會向黃柏高要求做一哥時，安仔話：「最緊要唱片賣得，賣得好做契弟都冇所謂。做咗一哥，但唱片唔賣得咪俾人笑。」
由美國歌手、籮霸珍妮花洛庇絲主演嘅《五星級戀人》今日正式上映，由於珍妮花同盧巧音（Candy）同屬SonyMusic旗下，而美國嗰邊嘅SonyMusic見到Candy喺樂壇嘅成績咁好，所以搵佢幫套《五星級戀人》主唱香港區嘅宣傳歌，而歌名就叫做《猜樓梯》，呢首歌重會收錄喺Candy嘅新碟裏面。
黃子華噚日接受商台訪問，講佢新嘅棟篤笑主題係「無炭用」，佢話想話畀香港人知，炭係用嚟燒嘢食而唔係用嚟自殺。子華喺節目度重講番之前做棟篤笑有一個環節請現場觀眾起一個題目，但係個觀眾就話要講消防員，令佢嗰刻好唔開心，因為佢覺得啲人想睇你點死。
翁虹有可能會進軍荷李活拍西片《賽金花》，佢噚日接受電話訪問，話早排去咗美國見過電影製作人，傾拍戲嘅事，如果接得成呢部戲，好大機會演一個由十五歲到二十五歲嘅角色。《賽》片嘅導演都係華人，製作費大約係二千五百萬美金（約一億九千萬港元），𠵱家喺洛杉磯搵緊個經理人幫手傾套戲。
劉德華有份開辦嘅加際星藝高校，喺早前搞咗個招收明日之星嘅公開報名活動，面試成功嘅除咗可以接受一個為期半年嘅免費課程外，重有機會攞到豐富嘅獎金同經理人合約，咁難得嘅機會，唔怪得每日都有成二百人報名啦！而身為訓導主任嘅華仔，雖然唔能夠親身做評判，不過佢都會睇番公司拍咗嘅錄影帶，畀吓意見。
蘇永康噚日喺新城做訪問，康仔話拍完手頭部戲就會同老友張衞健（Dicky）去內地登台。佢講到最近Dicky同周星馳傳出不和嘅報道，康仔話：「我都有睇過，我識嘅Dicky絕對唔係借人宣傳嘅人。而星爺有佢嘅地位，但Dicky如果要做嘢都會有好多人幫手。」而噚日係謝霆鋒正式復出嘅日子，康仔贈言霆鋒淡定有錢剩，從容面對。
