我大口羅拉覺得睇嘢都有好多種層次同角度，唔好以為椎名林檎只係一個識得扮鬼扮馬嘅rock女，佢雖然結過婚又做咗媽咪，但仍然係一位好有創意嘅實力女歌手，佢嘅音樂同形象都有特別嘅意思，唔係純粹追求視覺享受，比起好多偶像歌手高班好多！
林檎喺新碟《加爾基精液栗之花》入面，由紅色和服娼婦分身成為黑衣出殯女郎同白衣尼姑，完全都係為咗配合新碟入面充滿生死輪迴意味嘅歌曲，而佢每次都只會幫啲有深度嘅雜誌影相，當中《Rockin'OnJapan》特別受林檎嘅擁戴，繼前年佢為雜誌拍咗輯技驚四座嘅谷胸寫真後，今次又分別化身成黑牙怨女同白衣太空人兩個癲look，都算有心思。
林檎一向好鍾意玩和服look，佢特登搽黑棚牙，象徵新碟嘅歌曲喺傳統嘅和風中，加咗好狂好癲嘅新元素。至於林檎着一對sexy嘅襪索緊大髀，又以猥褻動作揸住條尾嘅太空人造型，正正係代表佢今次喺新碟繼續大膽談性，而歌曲亦充滿咗宇宙感覺嘅電子音樂元素。