city'super加Log-on開倉，就好似一間新世代嘅雜貨舖大平賣，由去街用嘅購物袋至工作間用嘅文具，再到放喺屋企嘅裝飾擺設，甚至晚晚俾你攬住瞓覺嘅毛公仔都可以喺度買到，價錢最平減至一折，去兜番個圈，包你滿載而歸。
記者：馬慶武 攝影：黃子偉
Model：YanFromSunSpot
可愛/型女必備
布滿閃銀星星圖案嘅購物袋，設有兩個細袋喺前面，大袋內亦有暗格可放銀包，間隔夠實用。除藍色外，還有白色及紅色兩款。
Log-on的購物袋款式極多，開倉當然唔會只得一兩款，其中最抵係減至原價一折嘅夾棉質地購物袋，顏色有勁搶嘅橙色同螢光綠色，袋上更有不同布章，只賣$39實在好吸引。另一款則係棉質製造的，設計較為簡單，勝在夠平夠輕便。
沙灘必備有型拖鞋，人字拖上印有星星、格仔等圖案，去沙灘、着落街都得，趁開倉二十蚊一對，梗係要買定一對嚟迎接陽光海灘啦。
呢隻兔仔較為大隻，但開倉價都係幾十蚊。全隻毛公仔裏面都塞滿棉花，軟綿綿，用嚟攬住瞓啱啱好。
雖然唔係咩名牌Charater，但呢度賣嘅毛公仔就勝在質地好又夠晒軟綿綿，另外公仔Size亦有大有細，呢隻熊仔就屬於最細隻嗰類。而造型則係嚟自日本嘅設計，每隻頸上都有透明吊墜，你睇Model阿Yan攬得咁肉緊，就知佢哋有幾可愛啦。
品味生活雜貨
今次開倉，相架都算係最多款式選擇嘅貨品，不論木製或金屬製，款式一樣精緻。好似左邊呢個木製相架，就兼備埋相簿嘅功能，裏面可放三十張4R相，而頭頁一幅則成為相架主角，原價二百幾蚊就好似貴啲，開倉價五十蚊就合理有餘喇。而右邊的玻璃製相架，好明顯係賣款式，整個相架由玻璃及金屬絲製，但只有中間部份可放一張4R相片。
SURAJohn&Mary金屬人形剪影名片座（右）
SURA金屬名片座（下）
SURA以一系列男女人形剪影形狀的名片座、相架為今次開倉嘅主打，另外亦有類似金字塔形的名片座，全部以金屬製造，墜手而且充滿設計風格，每個款式也有三種不同顏色可選擇，放在工作枱上特別有型。
透出淡淡藍色的玻璃水杯，有多種不同款式，飲水飲酒都啱。十蚊一個，但設計、手工卻絕非一般十蚊店貨色可比。
一款輕便的燭台，除可作裝飾外，當然亦可放上香薰蠟燭。開倉價無論大細都唔使十蚊，買多幾個放喺屋企點綴一下，浪漫氣氛滿瀉。
生活放輕鬆
近年香港人個個都話精神緊張壓力大，所以今次開倉亦不乏生活減壓用品，呢個散發薰衣草香味嘅眼墊就係比較特別嘅一樣，眼墊可放入雪櫃冷凍，戴上後可令眼部附近肌肉得到鬆弛，薰衣草香味亦可令精神放鬆。
大量實用貨品之外，亦有消閒玩意，這個OddBall充氣後可以讓人坐在上面一邊彈一邊行，而頭頂兩支凸出嘅係扶手，除橙色外還有桃紅及藍色，大人細路都一樣啱玩。
city'super超市嘅貨品一向受歡迎，可惜超市貨品大多數都唔可以放太耐，所以今次開倉只會有小量小食糖果開倉，其他飲品、即食食品一一欠奉。
開倉日期及時間：
3月12日-15日11:00am-8:00pm
3月16日11:00am-5:00pm
開倉地點：尖沙嘴廣東道11號世界商業中心3樓（海港城展銷集）
查詢電話：23758222
付款方法：現金、易辦事、信用卡（購物滿$300才可使用信用卡付款）