個市似乎擺脫美股嘅影響，恒指只係微跌2點，藍籌並且有明星股跑出，是日中信泰富（267）再升60仙，收15.80元，市場等中信今日報佳音。
中信兩隻Call輪9480同9298，因為輪價基數細，升得好爆炸，9480由1.1仙升上2.1仙，升幅就係91%，成交唔多；9298由「冇得再跌」嘅1仙，升上1.5仙，升幅50%，有31球易手。9480下月初到期，行使價16.70元；9298則喺6月杪夠鐘，行使價17.89元。炒呢兩隻輪，要睇清楚到期日同行使價。
對中信Call輪有興趣嘅，正路對象係9646，明年3月到夠鐘，現價18.1仙，溢價8.2%，槓桿率8.7倍，數據好合理。
另1件醒目嘅藍籌係中銀（2388），已訂本月20日派末期成績表，股價由8元升上8.15元。博中銀派送好，應該諗隻Call輪9462。7月到期，現價8.2仙，負溢價0.6%，槓桿率9.9倍。中銀末期息唔知點派法，假設派0.20元，9462嘅溢價實際都係1.9%；假設派0.30元，隻輪溢價實際亦不過3.2%，都重係抵買。中銀若然派高息，理論上不利Call輪，但派高息拉起正股，正股升亦對Call輪有利，戥番。
章盛