經濟不景，公益金籌募善款籌得鬼咁辛苦，好彩有梁錦松呢啲飛來蜢，幫補一吓。話說阿松星期日爆響口，話會捐出雙倍凌志新車差價，即係十萬銀畀慈善機構，以證明佢一月買車並非為避稅。到前日單醜聞愈揭愈醜，佢就加碼捐夠三十八萬，真係豪，重講明啲錢會捐畀公益金，兼且已經捐咗。
咁大個善長飛埋嚟，公益金當然非常高興，但係八方噚日問咗成個上晝，都冇人話見過啲錢，莫非有變？正當大家等到好焦急之際，有人打開一封掛號信，冇錯，就係財爺嘅三十八萬支票一張。
阿松咁善心，公益金方面梗係好多謝佢同埋佢位千金啦，更希望佢繼續為社會作多啲貢獻。
順帶提提，公益金呢個年度到六月底止想籌一億五千萬，𠵱家距離好遠，請大家幫幫手。買多幾架車都唔拘喎。
傳真︰2623-9278
電郵︰