香港電台製作咗個《革命的足跡》嘅電視節目，為咗壯一壯聲勢，噚日喺西環中山紀念公園搞咗個植樹活動，重特別請到三個革命先烈嘅後人：國父孫中山後人孫偉勇、香港革命報人黃世仲後人陳堅、興中會第一任會長楊衢雲後人楊興安，介紹各位革命先烈嘅事迹，國父三個港大校友：馬丁李柱銘、蔡素玉同余若薇都有助陣。
主持問三位國父校友，佢哋讀書時究竟有冇受革命先烈嘅思想影響？點知馬丁話以前掛住踢波，蔡素玉就話自己讀理科，余若薇都係掛住讀書，冇乜點理革命嘅事。余若薇就話唔信馬丁，事關馬丁以前搞港同盟，個名都同國父以前嘅同盟會差不多啦。馬丁聽到當堂跳起，佢話港同盟又好，𠵱家民主黨又好，都係爭取民主，唔係搞革命！ 區民傑攝
﹙圖﹚李柱銘（右）同蔡素玉（左）以及余若薇（左二）都話喺港大讀書時，冇乜受過孫中山先生嘅革命思想影響喎。
傳真︰2623-9278
電郵︰