小初噚日無事忙，去中環文華飲下午茶，撞到年輕賓架，佢話剛剛見完個大陸客，想買隻殼玩吓。
小初有啲唔明白，家陣股市唔係好好景，集資其實唔容易，點解大陸客仍然對香港買殼呢類活動樂此不疲？年輕賓架話，人哋買殼自然有其用途，總之人客買得成，佢有服務費收就可以。
小初八卦，想知究竟家陣有幾多上市公司放緊盤？年輕賓架話，數目其實唔少，其中上市唔太耐嘅盈新遊樂（703），江湖傳聞有人想洽購控制權。
小初記得之前都提過呢間公司，皆因多次出現追數新聞，連賭王四太太都追過佢數，睇怕四太若有意思，呢隻殼可能已經係佢嘅囊中物。
不過，年輕賓架話唔係咁，佢話融資界盛傳，殼王先至係有心人，皆因在盈新搞上市之時，人哋已經幫過大忙，否則隻股可能上唔到市。
不過，殼王成手都係殼，要多一隻又有乜作為呢？
慕容小初