阿松上星期四在新城財經台講咗一句「有咁耐風流（下刪五字）」，俾人鬧到暈。
其實當時只係早晨七時十一分、十二分左右，阿松飲杯咖啡，仍然未暖肚，講呢句話，實在係無心之失，不過亦可以講，佢哋啲高官對廣東俗話，唔係十分熟悉，故此低估咗在公開場合（特別係在電台）講俗語嘅傷害性，更何況香港不少人有負資產或失業或減薪之痛（或上述全部有齊），即使係言者無心，聽者有意，而且十分介意㖭。高官唔係唔可以講俗語，但如阿松後來補番，高官係番書仔女噃，不如預請劉天賜做老師，補習一輪先。
經紀K有啲同情阿松，佢話阿松主要係講經濟有咁耐風流，調整亦需時候喎，佢話睇到一張報紙記者報道，用「水盡鵝飛」一詞，睇到一頭霧水，卒之將報道嘅上文下理研究埋，方知道係「水靜河飛」之誤，睇嚟劉天賜如果開班教「俗語應用」課程，應該有益香港。
問經紀K對預算有乜睇法。經紀K引用賓架K之言：「阿松冇大刀闊斧削支出，好失望。」據講特首與阿松有打電話畀城中大孖沙、賓架，請佢哋支持預算案，公開發言時支持加稅，於是逢收到電話者都照辦。全世界商界都唔鍾意加稅，香港商人竟然支持加稅，可算一奇，亦足見特首與阿松有牙力。但係預算案出籠之後，只見加稅，而公共支出竟然增加四點四七巴仙，眾賓架為之媽媽聲！