數碼影音:<br>RicohCaplio300G誓做全天候數碼攝影王

數碼影音:
RicohCaplio300G誓做全天候數碼攝影王

繼早前CASIO出咗部三防數碼相機GV20之後,Ricoh亦都不敢怠慢,推出Caplio300G,一樣有三防功能,即防水、防震兼防塵,我哋今次實地喺工地測試,睇吓佢有冇資格做全天候數碼攝影王。

文:黃越發 攝影:陳盛臣
ImageGirl:Michelle

呢部300G可謂為地盤工友而設,睇份說明書就知啦!拎住相機個人仔都係戴埋頂安全帽,好抵死!重標明就算用工業手套,都可以輕易按鍵,因為按鈕夠晒大個,按下去很有質感。全自動拍攝,操作容易,真係唔識字都識用,個內置閃光燈夠勁,工友進行地底、水渠拍攝都掂,不過如果微距拍攝用閃燈會出現過份曝光情況。

RicohCaplio300GProfile
感光元件:324萬像素CCD
變焦:3倍光學
儲存媒體:內置8MBRAM,支援SD卡
體積:135×66×66mm
重量:310g
售賣點:豐澤電器(25555788)
$4,988

全世界最快快門反應
300G擁有全世界最快快門反應,只需0.22秒,就可以完成對焦,重會即時在LCD顯示屏顯示光圈和快門的資料,捕捉每一刻精采片段,影越野賽車就至好不過。喺水底拍攝,好容易對唔到焦,就算對焦不正確,亦容許按下快門硬影。電池方面竟然可以有三種選擇:火牛、2粒2A電或用專用電。但不可以同時使用兩種電池,隨機附送的專用電都算幾大,有1800MA。在不開閃光燈、變焦和LCD顯示屏的情況下,用專用電可拍攝超過3,500張640×480相片,在一般情況下,也可拍得350張,夠晒慳電,去兩日一夜露營,一粒專用電都夠用。

上山下海一樣掂
雖然話為地盤工友而設,不過亦係愛好運動的人不二之選,例如踩住單車周圍影相,一般數碼相機上山落山掟急彎,一定震到儍,相信好快就玩完。又例如玩獨木舟,就算用密封袋封好部機都難保不會入水,用300G就解決到問題,真正想點影就點影。

即Check!防水防震防塵
外殼有一層很厚的軟膠,可以做到三防功能,有效減低震盪,而且清洗容易。就好似筆者今次整啲泥落去部機度,沖一沖水就立即回復原狀。襟撞襟跌之餘,更可到水深三十米拍攝,但由於水壓問題,最多只可以潛30分鐘。以業界的標準去評級,呢部機有JIS7級防浸及防水能力和JIS6級防塵性能,用家即使在大塵的環境或雨天下拍攝亦冇問題,不會因而影響攝影質素。如果去到水清沙幼嘅沙灘,重可以錄120秒AVI檔案格式的無聲影片㖭,錄吓啲魚游來游去,都不知幾過癮。AV視像輸出和電池位,都有活門保護,要扭開安全掣先可以放電或SD卡落去,相當穩陣。

強勁功能三防機
同CASIO早前嗰部三防機相比,今次Ricoh的Caplio300G在規格上確實強很多,擁有320萬像素CCD及3×光學變焦鏡頭,微距僅1cm,重可以接駁TTL外置閃燈,方便夜間拍攝和補光。具備六種不同場景模式,當中最特別的是高感光度模式,於暗黑的情況下拍攝,LCD顯示屏就可以易於觀看。重有一個模式可在2秒內可連續影16張相並儲到同一個檔案中,成為一張分成16格一氣呵成的相片,影快速動作最一流。300G跟市面上的一般數碼相機比可能差唔多,但係三防機始終有其限制,例如光學變焦,今次呢部三防機喺功能上可算是一種突破。

街頭直擊

記者小評
300G幾快,Zoom盡時亦唔容易手震,雖然光圈唔係好大,但係都做到顏色同層次分明,比想像好好多,影像夠晒清楚。而且0.22秒快門反應確實很好,方便即時對焦即時影。

售賣點:康藝科技
電話:23079084
地址:深水埗高登電腦中心91號舖