港府嘅管治哲學真係趣怪，阿松不避嫌偷步買車，可能違反問責守則，阿董唔去檢討阿松，反而派林8D出嚟話要檢討問責制。唔通一眾問責官員認為現有問責制過於嚴苛，要將制度改鬆少少，就就阿松？事實上阿松近期所受壓力唔輕，噚日又因計錯車稅而追加捐款。好心《蘋果》咪日日啄住佢啦，容乜易啄啄下發現阿松計錯數，03/04年度赤字預算唔止698億元，搞到阿松要追加稅項，到時港股想搵人投資都難。
噚日港股一度跌破8800，低見8757，其後在中移動（941）及滙豐（005）支撐下，跌幅收窄至1點，收報8859，成交68億元。滙豐在81.75元水平，有歐美大行買盤守得穩如泰山，中移動因市場憧憬有息派，微升0.63%，收15.80元。不過，黑客聽到大戶繼續開期指淡倉。
數碼通（315）公布中期業績，轉虧為盈賺2.38億元，但只派中期股息2毫子，並未如市場所憧憬，派發特別股息。市場好似有人預知呢個消息，搶先沽定貨，股價跌2.34%，收報8.35元，成交1280萬元。不過，管理層表明會研究派特別股息及回購股份，並暗示新地（016）可能在8.50元以下增持數碼通，因此數碼通短期大跌機會唔大。
中信泰富（267）今日公布業績，噚日股價勁升4%，收報15.80元，成交達1.91億元，市場傳出中信炒派高息。ｉ師傅亦話，證券界估計中信盈利增長逾70%，聽聞大股東及管理層股東都幾等錢使，加上投資冇出路，所以絕對有機會派高息。
阿虎