梁錦松偷步買車，累及政府總部八樓嘅街坊，佢兩位同僚林瑞麟同楊永強因為買咗車，噚日俾八方追住唔放。
其實，佢兩個都冇參與預算案制訂，應該唔關事，不過坐埋同一個辦公室，瓜田李下難免啦。
林瑞麟用四十幾萬買咗部BenzE240，一月出車，佢原本揸緊部日本車已經用咗八年，所以舊年十一月訂新車；佢慌死成為話柄，再三強調，從未諗過會慳到首次登記稅。
至於楊醫生，佢話部舊Benz已經揸咗七年，所以換部新啲嘅車揸吓，訂係訂咗，不過重未出車，咁咪即係要交新稅囉。
當然，如果你唔係做高官，又唔係有份度個預算案，邊個會理你買乜車，好似Baby李國寶就訂咗架BenzEClass畀個仔揸，十二月落定，六月先至運到香江，佢話交多的稅冇所謂喎。
傳真︰2623-9278
電郵︰