潮流興講車，噚日講過法拉利，今日不如講下勞斯萊斯。榮太子智健旗下間中信泰富，屬下有間大昌行，一直代理開勞斯萊斯同賓利兩款靚車，但今年起冇再做前者嘅代理，各位富豪若要買新勞斯，就要搵森那美。據八方所知，上個月一切已交割清楚，森那美計劃喺中環心臟地帶開個陳列室，方便班有錢佬去揀車。
大昌行集團行政總裁許應斌話，自從美國大眾同德國寶馬年前收購勞斯萊斯之後，各地代理權開始有變動，香港嘅代理權撥歸森那美，但由於每年賣出嘅勞斯萊斯新車多極有限，而且賓利、福士、奧迪仍屬於大昌行，呢啲車廠會陸續推出新車系，所以即使失去勞斯，亦唔會造成重大損失喎。
八方就覺得榮太子可能得益㖭，事關梁錦松咁加稅法，貴價車閒閒哋賣貴一百幾十萬，香港有錢佬雖然多，但一時間要買貴咁多都好難接受，你估個個係阿松咁富貴咩；總之個車市肯定有一段寒冬期，好彩森那美實力雄厚，換轉第二個都好難頂得順。
許應斌就話，貴價新車嘅落地稅加咁多，只會迫啲原先想買貴車嘅人轉買中價車，好在佢哋重有唔少中價嘅日本車賣，之不過，新車銷路有排都復元唔到。
（圖）榮智健中信泰富旗下嘅大昌行冇再做勞斯萊斯代理，可能重有得益。
傳真︰2623-9278
電郵︰