謝霆鋒和容祖兒前日先後因身體不適往養和醫院求診，齊齊留院兼吊鹽水。昨日霆鋒堅持帶病出院，但離開醫院前他先打了五支特效針，屁股開花仍死撐開工，今日他則會如期出席在灣仔君悅酒店舉行的復出記者會。而容祖兒就比霆鋒幸運得多，昨日精神奕奕地離開醫院後即回家大覺瞓。
英皇集團前陣子是非多多，近日旗下歌手則病魔纏身。謝霆鋒今日在灣仔君悅酒店舉行復出記者會，但他前晚卻在拍攝廣告後，突然感到身體不適，即時往跑馬地養和醫院求診，醫生證實霆鋒患有急性腸炎和發高燒，需要留院觀察和吊鹽水，碰巧容祖兒（Joey）近日工作過勞，前日在家昏倒，亦送到養和接受治療。
而霆鋒和Joey經過一晚休息後，昨日先後出院。霆鋒昨午約二時離開養和，在英皇高層阿輝攙扶下步出醫院，只見他步履輕浮，非常憔悴。
霆鋒甫出院即趕往啟德舊機場，繼續進行新世界流動電話廣告拍攝工作。昨日有雜誌報道指霆鋒去年串謀妨礙司法公正罪成，被判罰履行的二百四十小時社會服務令已完成，記者昨日向霆鋒求證時，他笑笑口點頭。
昨日抱恙開工的霆鋒，一埋位即強裝精神，跑步時更健步如飛，又捱冷穿上背心拍攝，認真可憐。但霆鋒卻未有理會醫生勸告，休息時跟工作人員躲在車上抽煙。拍完廣告後，霆鋒於晚上七時許先返家休息，然後再返醫院繼續觀察。
霆鋒經理人霍紋希（Mani）在電話中說：「霆鋒同Joey病都一齊病，佢哋都算『吊鹽水孖寶』，原本醫生唔准霆鋒出院，但佢堅持要去拍嘢，所以醫生咪同霆鋒打咗五支特效針，可以維持約十個鐘，霆鋒屁股都俾針打到開花，佢今晚（即昨晚）拍完嘢又要返醫院吊鹽水。」
問到霆鋒的病情可會影響他今日的復出記者會時，Mani說：「霆鋒復出記者會一定會如期舉行，我哋會畀佢喺醫院休息多晚，再接佢返屋企梳洗，然後先去記者會。」霆鋒的記者會可有擇吉時舉行？Mani說：「唔使，總之唔係『破日』就得啦。」
此外，昨日上午十時多，Joey身穿厚大衣和戴上冷帽出院，精神奕奕的她一直面帶笑容。Joey與接她出院的母親隨即乘坐保母車離開，直駛Joey位於跑馬地的寓所，臨行前Joey還不忘向記者揮手道別。
記者昨日致電Mani查詢Joey的情況時，Mani說：「Joey已經返咗屋企休息，佢話多謝大家關心，佢呢排工作好忙，每日瞓得一、兩個鐘，身體虛脫，聲都失埋，所以今日（指昨日）拍劇通告都取消咗，等Joey可以瞓番晚，佢話唔想阻礙拍攝進度。」
採訪：何永寧、比華利、卓寶花
攝影：何國豪、甄朝健