響今屆瑞士日內瓦車展上，法國雷諾車廠除展出全新MeganeⅡCoupe-Cabriolet外，同場亦展出全新ScenicⅡ，亦惹來不少車迷注視目光；新車除造型屬全新設計外，就連尺碼及車廂布局亦有所改動。𠵱家不如一齊嚟先睹為快，睇吓ScenicⅡ有幾吸引啦！
記者：鄭達基
雖然ScenicⅡ尚未正式推出，但從廠方公布嘅相片中可以睇到，新車擁有一個全新造型設計，予人耳目一新之感外，望落重帶有點MeganeⅡ嘅影子㖭！而家族式鬼面罩襯以低斜頭燈組合，亦見有一份吸引力呢！至於車廂方面，由於車長較原有型號多出80mm（達4250mm），所以空間會較前來得寬敞闊落，天幕式車頂配搭更能給予車上乘客有更多親近大自然嘅機會呢！
然而，廠方為新車提供多台引擎作選擇，包括有1.4公升（98匹）、1.6公升（115匹），同埋頂級2.0公升（136匹）型號，以切合不同用家需要；而向來以安全度高見稱嘅雷諾汽車，呢款ScenicⅡ亦備有多項先進安全配備，以保障車上乘客安全呢！