有位靚仔歌手最近嘅遭遇，馮仁昭都幾同情，呢位靚仔歌手原本家境唔錯，一出世就要乜有乜，點知金融風暴之後，佢屋企發生好大嘅變化，𠵱家變咗由佢一個人撐起成頭家，其實佢都幾生性，呢幾年佢都好勤力做嘢搵錢，幫屋企還債，不過佢個家姐就冇佢咁生性，明知屋企唔好環境重亂買嘢。
話說靚仔歌星個家姐早排去咗某名店掃貨，點知佢張卡已經碌爆咗，後尾佢竟然話入埋佢細佬數，等下次佢細佬嚟幫佢找埋。過咗幾日，佢細佬落去呢間時裝店買衫嗰陣，知道咗呢件事，嬲到衫都冇買，淨係找埋條數就走人，不過佢都話畀個店員知，下次佢家姐買衫啲數最好搵番佢本人搞掂。
唉，靚仔歌星知道屋企環境唔多好，不知變得幾慳家同乖仔，好心佢家姐學吓個細佬啦。
郭富城（Aaron）近日接拍嘅內地電視連續劇《動感豪情》，該劇即將開拍，全劇會喺香港取景拍攝，Aaron喺劇中會飾演一個歷盡滄桑嘅香港人，除咗Aaron之外，內地紅星李冰冰同尤勇都有份參與演出，而剛同劉德華拍完《老鼠愛上貓》嘅李冰冰重會同Aaron喺戲入面有浪漫嘅激情戲演出，大家真係要拭目以待啦。
利嘉兒噚日喺銅鑼灣為護膚品「Philosophy」擔任嘉賓，佢重好開心話𠵱家傾緊呢隻牌子嘅贊助，問到每個月用幾多錢喺護膚方面，佢話：「都用好多錢，每個月都要成幾千蚊㗎。」再問佢想唔想試吓拍劇，利嘉兒就話：「拍劇自己就冇乜天份，我對做主持方面比較有信心。」
梁漢文（梁炳）噚日到新城電台接受訪問。問到梁炳知否霆鋒肚屙入院時，佢話：「屙咋，屙都想上港聞？我𠵱家擔心阿松（即梁錦松）多過阿鋒！」梁炳重話自己兩部車已經供斷，無意再買車，佢話：「𠵱家大家生活咁差，買新車嘅人已經唔多，再加稅啲車行好難撈，我聽聞有車行喺財政預算案公布後都要執笠，𠵱家啲稅咁貴，我真係冇諗過買車。」
張栢芝噚日接受新城節目《家天下》電話訪問，家燕姐問到成日俾狗仔隊跟蹤嘅栢芝會唔會覺得好唔開心，栢芝話：「都好大壓力㗎，都唔係短時間，已經係幾年間嘅事。最唔開心嘅就係有某啲記者係針對性，都有啲嬲㗎。」問到佢有份參演嘅《健美先生》，被劉德華點名要一齊合作，佢話：「知道後好開心，華哥好好人，我有需要改進嘅地方，佢會坦白同我講，好似朋友咁教路。」
佘詩曼噚日返電視城開工，問佢有冇收到陳浩民送畀佢價值二萬幾蚊嘅鑽石表作為相識一周年禮物，佢話：「冇呀！你哋唔好屈我呀，佢身邊有咁多朋友同屋企人，唔好將佢嘅事拉埋我落水。」
問佢如果真係收到會唔會好開心？阿佘話：「假設性嘅嘢我唔答，唔好引導我去講錯嘢。」