近年周不時出現獅子座流星雨，帶起唔少香港人觀星興趣，但香港光害實在太緊要，可以在漆黑天幕上睇閃閃繁星嘅地點真係唔多，就算有都要山長水遠。不過，坐落大埔荔枝山，背靠大帽山山脈嘅龍成堡，有觀星地利，光害亦唔算嚴重。
幫龍成堡做獨家代理嘅美聯物業，之前重為準買家搞觀星活動，吸引到唔少人查詢或洽購天台及花園單位。有見及此，發展商英皇集團就決定第日發售龍成堡時，首五名買家可以獲贈天文望遠鏡一台，每台價值八千八。
英皇地產部總經理陳志凌話，個盤月底前應可攞到滿意紙，到時以現樓方式發售，𠵱家有二十幾個客想買天台或花園單位。佢估計以平均呎價三千元推出，七十七個單位可套現約四億元。發展商當然希望可以賣到三千五蚊呎啦。另外，又有兩間大陸旅行社計劃，帶團嚟實地參觀龍成堡，初步有成四十人。
上個禮拜四截標嘅中環金城銀行大廈（圖二），經過一輪競逐後，噚日傳出已達成以三億二千萬元成交，呼聲最高嘅買家係協成行或有關人士。物業由中銀香港持有，樓高二十六層，總樓面七萬方呎，現已交吉，有份入標嘅重有新世紀集團等共六個財團。
至於日前以近三千萬買入恒生屯門舖嘅永倫集團或有關人士，再度出擊掃貨，以一千八百五十萬元，購入深水埗南昌街地舖，有一萬方呎，𠵱家由惠康超級市場租用，每月十三萬，租金回報率8.4%。
投資移民政策落實在7至9月接受申請，利嘉閣董事總經理何紹章表示歡迎，重認為對樓市有正面刺激作用，會令下半年中高價物業交投更為活躍。
佢又分析現時外圍局勢緊張，中東、南北韓局勢不明朗，大批投資者會尋求資金避難所，香港嘅先天優勢，加上投資移民政策，相信可以吸引更多東南亞，以至日韓投資者來港發展，刺激本港經濟及樓市發展。不過，對於投資額下限為六百五十萬港元，何紹章就認為合理，同各大地產商意見不一樣，可能大家睇嘅目標唔同啩？
中環蘭桂坊大業主，被譽為蘭桂坊之父嘅盛智文，一向好有生意頭腦，由他持有嘅蘭桂坊一號全幢物業，最近就委託代理招租，每單位劃一月租金兩萬元，將由傳統寫字樓變身為樓上舖。
蘭西收到料，業主見寫字樓市道唔好，政府又將重點發展蘭桂坊，同埋中區警署、域多利監獄一帶，所以將物業重新包裝成為售賣紅酒、首飾、精品等銀座商場。獨家代理租務嘅美聯物業文國華透露，蘭桂坊一號每層917方呎，一梯一伙，現有六層樓面已交吉，變身後租金有一成到一成半升幅。
近年內地房地產發展蓬勃，內地人對物業管理質素又愈嚟愈高，因此，香港唔少物業管理公司，都積極拓展內地嘅物業及設施管理市場。其中新昌地產管理就喺本月初，去貿易發展局喺廣州搞嘅「香港房地產服務博覽」，同內地同業交流心得。
據新昌物業管理（中國）業務拓展總監丁逸偉講，佢哋已經分別同北京及廣州兩家公司各組合資公司，另喺深圳成立全資附屬公司，全面開拓同建立地區關係。𠵱家新昌已接到多個管理項目，如北京神州數碼同北京烽火科技等。
蘭西
電郵地址：