我求大俠知道有唔少球迷，都對AC米蘭教練安察洛堤嘅領軍能力有所懷疑。而呢位發福教頭，喺今晚對歐冠盃對皇馬時又有「佳作」，竟然收起恩沙基呢位有得爭神射手嘅前鋒！
恩沙基喺今屆歐冠盃入咗九球，僅以一球落後首位嘅雲尼斯達羅。照計𠵱家AC米蘭已經出咗線，出咩副選去踢都無所謂，但起碼都畀恩沙基落下場爭射手獎，偏偏安察洛堤就冇帶埋呢位前鋒去西班牙鬥皇馬喎。
噚日我求大俠都講過，安察洛堤話喺聯賽收起李華度，係要留力打呢場波，似乎唔想放皇馬呢隻猛虎歸山，要佢哋出局咁話。但𠵱家又唔出恩沙基，真係唔知佢想點！
早陣子被發現腎臟患癌症嘅馬德里體育會門將貝高斯，經過手術後目前正在康復中。能夠逃過大難，呢位阿根廷門將第一時間就呼籲其他人唔好吸煙，因為佢就係吸煙，搞到𠵱家生癌喎！我求大俠覺得佢絕對係個好例子，由佢出聲叫人戒煙或者反吸煙就最夠晒說服力。
足總盃「巨人殺手」錫菲聯，喺準決賽將會對住阿仙奴或車路士。你哋估下錫菲聯領隊華諾克，會希望對手係邊隊？梗係車路士啦！有邊個想對住超聯冠軍阿仙奴吖。不過華諾克就解釋，因為蘇拿係佢最欣賞嘅球員，希望可以會一會佢，及拎到佢件波衫留念。咁樣就要睇阿仙奴通氣定爭氣嘞！
點解啲球會可以咁大懵？本地球會南華及流浪諗住加強實力爭銀牌，最近就分別簽入南韓中場金文哲及巴西前鋒佳古奇。但係足總有例，淘汰賽展開後唔可以再註冊新球員，即係話兩會將得物無所用！唔單止本地波，最近分別去咗卡塔爾搵食嘅羅馬里奧，以及上海申花嘅前漢堡球員艾拔斯，亦係因為過咗註冊限期，唔能夠替球會喺亞冠盃上陣！
周一晚英甲森林對甘士比，賽前網上有口痕友笑我哋名家青蛙仔，竟貼呢場和波開下盤！重話甘士比要護級，森林都要爭升班啫。我求大俠唔怕話畀你聽，我哋班名家用嚟解畫嘅數據，某程度上只係客觀因素，即係第六感呢樣嘢好難解釋，未知結果好難叫人認同。總之呢期青蛙仔旺過旺角，佢嘅貼士，「只要信不要問」，包你有運行！