百多元團費，包兩餐、有專車接載遊港九兼且不收小費？報紙上不時都會見到這些本港一日遊的廣告，睇落好似好筍，但實際會唔會將貨就價，又或者另有蹺妙？究竟參加的人多數是國內遊客還是本地人？為了解開疑團，今次就搵個特派專員喬裝遊客，參加了一個只需$120，包足兩餐的本地團玩一日，實地同大家Check一Check，看看是否貨真價實。
撰文：特派調查員 攝影：Kenny
今次特派專員所參加的一天團，去的是文武廟、摩羅街、金紫荊廣場等例牌旅遊點，香港人會否覺得悶呢？到了集合當日，赫然發現團友九成是本地人，半數是長者，三、四對中年夫婦，還有幾個年輕人，而當中更不乏呢類本地團的捧場客，好似團友明叔明嬸就經常參加呢類本地團，「唔使自己煩，有得食有專車坐，重平過自己去！」之不過，特派專員所參加的這個包兩餐兼不收小費的一日遊，最終是否能夠照單（旅遊單張）全收？一於跟足全程睇睇是否有咁筍。
去中環皇后碼頭集合，都好方便，團友準時到齊，於是亦準時十一點開車。在半個小時的車程中，導遊先講解文武廟的歷史背景，然後就話畀大家知可以去有古董街之稱的摩羅街，不過，導遊不單止沒有硬銷話一定要去某某店舖購物，反而提醒大家真的遇上心頭好又負擔得起才買，恐防大家真假難分。不過，自問是後生一輩，對入廟拜神及古董興趣不大，好在兩個景點只安排逗留半小時，未至於悶親，反而部份長者就已經是重遊舊地，買東西的團友不多。
上船食自助餐，的確有新意，即時加分。本身呢艘「海上遊洋紫荊」於閒日會提供遊船河自助晚餐，街客可以隨時幫襯，但自助午餐就只為呢類本地團開設，所以都算是呢個團的特色之一。可惜，自助餐得一個小時，所以艘船只是泊在岸邊無郁過，稱不上是船河自助餐，不過，當日成隻船得一團約40人，環境同食物質素可以媲美酒店，同一般酒店約百一、二蚊的自助午餐差不多，但呢個價錢已經是包兩餐加交通費的團費，計落認真抵。
跟團就有呢個弊處，就算對某個景點的興趣不大，都一樣要照跟，好似呢個團就包括參觀位於慈雲山的慈雲閣，內裏有同道教有關的壁畫及陶像，有點似已關閉的虎豹別墅，有團友就對呢個地方無甚興趣，行了十多分鐘便坐低等上車。緊接是去龍翔道觀景台，導遊都知道齋睇景毋須太多時間，只逗留20分鐘就走，安排恰當。
老實講，真的是頭一次來呢個特賣場，自己肯定不會來，自問甚少搭東涌線，何況跟團原來有着數，落車先來一份紀念品，雖然只是兩張比較啱小朋友的公仔貼紙，若然購物儲單夠$200或$300，就換到一隻A4紙那麼大的毛毛公仔，有團友話平時唔識得自己搭車來呢個特賣場，而且自己來就沒有這些優惠。最後，個個團友都大袋小袋，收穫甚為豐富，是除了食以外全日行程中最受歡迎的一個節目。
晚飯的酒家專做團體客，所以圍圍都是那幾味小菜，蘿蔔燜牛腩、炒菜、蒸魚、燒味，味道一般，但就熱辣辣。正如導遊事先講明，別期望是大魚大肉，幾味普通家常小炒，但勝在免買、免煮、免洗，食完就走得。不過，暗地裏問過酒家負責人，原來每位收$40，佔了團費的三分一，都唔算平價貨。
總括來說，今次這個團的確抵玩，首先有專車接載，毋須自己諗點搭車左轉右轉，而景點雖然就好像聽慣聽熟，但平時又真的不會專程去。最叫我意外的，是導遊相當專業，沿途講解詳盡，去完對香港認識都多了點。
以特派專員所參加的呢個包兩餐本地團為例，齋食兩餐已經差不多回本，列明不收小費，到最後真的不額外收多一分一毫，絕對抵玩。其實本地旅行團的種類很多，市內、離島、尋幽探秘的樣樣有齊，後生仔、老人家，都應該找到合心水之選。
志蓮淨苑、海防博物館、望海觀音、赤柱、美利樓、特色潮州菜，團費：$88，查詢：28533715（香港中國旅行社）
金紫荊、赤柱廣場、淺水灣、山頂、粵菜，團費：$89（推廣期內不收小費），查詢：25610718（香港油蔴地旅遊有限公司）
南丫島、蒲台島、海鮮餐一天團，團費：$99，查詢：28533715（香港中國旅行社）
蒲台島奇石探勝海鮮餐，團費：$99（另加小費$15）查詢：25610718（香港油蔴地旅遊有限公司）