今日出版的亞洲版《時代》周刊訪問了謝霆鋒，他表示在獄中認識了不少朋友，稍後更會探望他們。霆鋒又笑稱，自頂包案後，收入竟比以前高出四成。
謝霆鋒最近接受亞洲版《時代》周刊訪問，在訪問中除了透露生活狀況外，更揚言最近的收入比以前增加四成，他更堅持真我個性，以鞏固其壞孩子形象。周刊訪問部份內容直譯如下：
（ 記： 記者 謝： 謝霆鋒）
記： 自從嗰單意外後，你睇嚟少咗自信。你一向都頗自負，你覺得自己有冇改變？
謝： 我已經學習到唔講任何嘢先可以更加自負，正好似拳王阿里咁自負一樣，佢（喺擂台上唔出聲）打低對手，比起囂張咁打低人更精采。
記： 之前有報紙寫到你喺監獄好懦弱，指你話自己有哮喘，唔應喺入面。
謝： 我都聽過好多類似嘅嘢，但最有趣都係，喺入面嘅人睇到報道後，佢哋終於知道出面啲人只係亂講一通。嗰陣重有傳過我喺入面俾人用結他扑頭，入面嘅人都話：「搞乜鬼呀？我哋呢度根本都冇結他！」
記： 你喺嗰度有冇識到朋友？
謝： 嗰度有好多人幫我度過失意時，當所有法律上嘅嘢搞掂後，我會再去探佢哋。
記： 你覺得呢件事後，你有冇需要改善形象？
謝： 唔使！我曾經係叛逆漢子，但𠵱家已經唔係，我只係一個會講真話嘅人，所有唔講真話嘅人都係好差！
記： 我哋聽過自從單嘢之後可口可樂同你解約。
謝： 實際上我哋𠵱家已再簽約，我手頭上有七個廣告合約，重會監製新歌，最好笑係我收入比以前高咗四成。
