鄭伊健同趙薇𠵱家喺上海拍緊寰宇套新片《炮製女朋友》，佢哋兩個都係玩得之人，所以經常大放笑彈，伊健淨係講毛都笑到趙薇肚痛。
伊健喺片中飾演一名形象指導，劇情講佢應一位富豪嘅邀請，為佢失散多年嘅千金趙薇做形象，幫佢改頭換面，於是伊健就帶趙薇去咗當地嘅髮型屋整頭髮，又帶佢去美容院做facial。點知佢兩個喺美容院拍戲嗰陣，伊健就係咁搞人哋部皮膚測試機，好鬼貪玩。
伊健做完皮膚測試之後，美容師大讚佢塊面除咗比女人多毛之外，佢嘅皮膚都好好，而伊健見部機咁神奇，竟然測埋自己對眼同埋耳窿，因為部機有放大功能，所以趙薇見到伊健放大咗眼睛同耳仔個樣之後，即刻笑到肚痛，趙薇重話知道伊健嘅耳仔有毛，覺得佢好有型喎！
趙頌茹（阿Yu）、范振鋒同梁奕倫，噚日齊齊去新城做訪問，身為港台DJ嘅范振鋒同梁奕倫初到其他電台，好識做咁送禮物畀阿Yu。
日前阿Yu個老友何韻詩宣布拍拖，阿Yu竟然話：「真係？佢冇同我講喎！佢男友係邊個呀？咁我都拍緊拖啦，佢真係拍緊咩？」
時裝版《皆大歡喜》會喺下周四（二十號）開拍，所有演員陸續返電視城試造型。據知《皆》劇會用番原班人馬做，噚日薛家燕返將軍澳電視城試造型，佢話因為佢演好姨個角色太深入民心，所以今次時裝版《皆》劇個造型就要同好姨唔同，佢話：「𠵱家初部試造型，個髮型好重要，不過衫就唔使擔心，因為已經有間時裝店話贊助我，每個月二十套衫，着完重唔使還㖭！」
李克勤噚日去新城電台接受訪問，主持人蘭茜特別送咗一對過大禮用嘅椰子畀佢，賀佢隻新歌《合久必婚》。克勤話同譚詠麟喺今個月舉行嘅澳門演唱會，喺棟篤笑環節會講陳小春同張栢芝喺泰國推油一事。克勤話：「喺下個月嘅香港演唱會先講就遲，到時我哋會全部作出嚟，介紹正確嘅推油方法，同原本嘅故事冇關。」
王傑噚日接受新城電台嘅節目訪問，講開謝霆鋒復出，王傑話係好事，佢話：「希望佢一帆風順啦！對於啲新聞唔使太介懷，事實勝於雄辯，有乜事我哋會企喺佢身後頂住，大家支持吓佢，唔好再寫唔好嘅嘢。不過如果佢啲緋聞啃唔落，我可以幫佢啃。啲記者成日將緋聞主角亂配，但配極都配唔到我，我都好想有緋聞！」
