最近經過深圳某商場，被一個婚紗攝影公司的廣告吸引住，這個廣告並非一般的婚紗照，而是過癮的電影造型照，在好奇心驅使下，當然要去睇睇搞乜東東，結果無令我失望，由電影《英雄》、《無間道》、《花樣年華》到電視劇《戇夫成龍》、《橘子紅了》的造型都有，全部都製作認真，絕對是想扮明星或者愛拍沙龍照的另類好選擇。
記者：歐嘉荃
攝影：林栢鈞
Model：William&Kin（fromSunSpot）、左揚
講到新鮮熱辣的電影非《英雄》莫屬，《英雄》分戶外版同室內版，我覺得戶外版比較正，有專車載去西麗湖渡假村取景，有草原景、湖景、樹林景，重有得騎馬，玩足半日，的確超值！
攝影師阿亮之前已到過這個戶外場景一次，所以當車一到，阿亮就即刻找了這棵開滿紅花的樹取景。雖然棵樹唔算好大，不過阿亮就住鏡頭，拍攝出來的效果確實不錯，兩位「攝青鬼」在暗淡的紅花前格劍，相當突出，充滿大俠Feel。
電影中，張曼玉臨自殺前的一幕叫人印象難忘，拍攝當然不能少了這一幕。只見左揚和William動作生硬的拍了這張照片，還頻頻NG，要培養感情再影過。講真，照片出來的效果與劇照不太相似，不過在拍攝現場作為旁觀者的我，卻覺得非常好玩。
嫌外景價錢太貴的話，我建議不妨選擇室內，雖然無大草原、無馬騎，不過個Feel一樣好正。室內照片在影樓拍攝，兩位Model只在白色的背景紙前，加上套了顏色玻璃紙的射燈以及大風扇，梁朝偉與張曼玉在瀑布前格劍的一幕立時活現眼前，不過我嫌女Model拿劍的手太柔弱，無乜俠女Feel。
在拍攝前Model當然要裝身，化妝的過程一點都唔馬虎，就好似本身是短髮的William，由於頭髮唔夠長，髮型師要出動假髮幫手，弄頭髮及一身的打扮就已經花了差不多一個小時。
由於William拍攝當日沒有鬍鬚，所以化妝師便用眼線筆幫William畫上鬚根，遠睇效果唔錯，近睇就好搞笑，我就笑足William一整日。
攝影師雷亮原籍西安，自小喜愛拍攝，早在七年前於張藝謀西安電影製片廠畢業。充滿藝術家感覺的雷亮蠻喜歡這些電影造型照片，「我們平日看的電影，普通人沒有機會可以拍到，我們將電影的效果融入攝影內，幫普羅大眾拍攝一些富電影感覺的照片，感覺特別新鮮。我選取戲內特別而難忘的畫面，加上自己的創作將其拍成硬照，感覺會較好。」
其實成隊Crew的人數不算多，只有攝影師及兩位助手，但事前工夫做到足，拍攝的場地一早已找好，所以拍攝進度理想，而且拍出來的效果絕對比想像中好。
《無間道》近期咁熱，雖然我覺得曾志偉同黃秋生好好戲，但要扮梗係扮兩位型男劉德華和梁朝偉啦！攝影師選取了尾段天台講數那幕，扮梁朝偉的阿Kin揸住支槍指向扮劉德華的William，雖然背景和電影內的大廈景有極大的分別，不過那弧形的廣告招牌卻帶出另一種氣勢來。
負責人Daniel話喺咁多個造型中，以《花樣年華》的造型最受女士們歡迎。其特別訂做的旗袍，以紅黑色為主調，配合橙黃色的燈光，簡直有時光倒流七十年的感覺。
澳洲留學生Andy：「我之前拍過《無間道》造型，覺得好好玩，睇番自己啲相，都覺得幾有《無間道》的感覺，點解唔拍《英雄》？我個樣唔襯古裝，所以唔揀！至於價錢我覺得唔算太貴，有時影普通沙龍相都要成千蚊啦！」
當我見到攝影師阿亮沖曬出來的相片，發覺佢哋非常認真，每張相片都經過後期加工，改變了原有的色彩，令每個造型更有氣氛。
店舖資料
芙蓉坊婚紗寫真攝影廣場
地址：深圳東門中路2013號九龍城廣場6樓
電話：(86)75525162722
營業時間：10:00am-9:30pm
收費：
?2,980（外景）
?1,980（影樓）
＊價錢包括一齣戲的四個造型，附送24吋相連框、12吋水晶相架、10x14吋相簿，內包括25張相片。