負責代理金冠米同雙羊米嘅老牌米商呂興合，最近搞搞新意思，舉行「衣食住行」抽獎兼宣傳，買呢兩隻牌子嘅米就可以參加抽獎。
呂興合助理總經理呂慶森話，「住」方面嘅禮品最大份，送二百萬元置業，名額一個。
指定要透過中原代理，二百萬元任由組合，畀首期又得，買兩層樓都得，新舊樓亦得。抽獎回郵信封，指定要喺中原各分行先有得攞。
中原董事總經理黃偉雄話，二百萬元包括佣金、釐印費及律師費開支，即係話得獎者可以得到大約一百九十幾萬嘅物業，市區盤如太古城或黃埔花園，可以揀到七百幾到八百幾呎嘅單位，至於細價新盤，更夠買兩伙。亦可以將二百萬當首期，買最近熱賣嘅豪宅好似貝沙灣、畢架山一號。
中原話，希望可以藉今次活動，吸引多啲客到中原，順手刺激睇樓量，尤其是二手方面。
呂興合於五三年已經創立，第一代係呂明才，到呂慶森已經係第四代，足足有五十年歷史。今次嘅廣告就搵咗兩名細路於中原分行拍攝，呂慶森話，謝霆鋒細個嗰陣，都有同屋企幫佢哋拍過廣告。
利嘉閣一年一度嘅精英會，就職典禮噚日舉行，做得好嘅員工，會講吓成功心得，等其他同事借鏡，其中以荃灣麗城分行高級客戶經理何淑貞（Iceey）嘅辛苦拼勁最感人，佢重講講吓一時感觸，嗚咽起來，全場亦屏息細聽她一番艱苦作戰歲月。
佢喺○一年已促成過百宗成交，○二年喺排行榜第十七位，錄得九十宗成交，佣金收入一百八十萬。成績倒退，她在台上自言好內疚，皆因曾承諾要一年比一年做得更好，但舊年卻成績不佳，話說至此，重眼泛淚光。其實，佢上年因為身體不適，只係用半年時間跑數，有九十單生意已非常厲害，可謂「半臂女鬥士」。董事總經理何紹章亦隨即勉勵員工，要以她為榜樣，向自己挑戰。
財爺一聲加稅，唔少市民心情都沉一沉，業主們就更加唔例外。一手新盤源源不絕，派錢低開兼大堆優惠，二手盤個價錢唔將就吓，都幾難賣得出。荃灣麗城花園（圖三）近排造價跟隨大市回落，利嘉閣一隊麗城分行員工，為促成生意，同業主傾到凌晨四點幾五點，至完成交易。聽有份傾嘅陳潤琪講，個單位喺三期五座中層H室，八百四十六方呎，業主原先開價一百七十萬，買家還價一百五十三萬，同業主通宵洽商，最後成功減低十七萬成交。
將軍澳新盤戰雲密布，氣氛同中東局勢差唔多，將中、維景派錢鎖客之際，突然殺出個程咬金將軍澳廣場，正式宣傳都未搞就已經收票，搞到重未開價嘅房協盤都要急急叫經紀就位，本周內大戰一觸即發。不過，一班經紀已立即變陣，由野外戰場轉打巷戰，蘭西噚日去將軍澳廣場售樓處兜一圈，發現唔少平時喺調景嶺站或者將軍澳站嘅代理喺度搏殺，相反，地鐵站出口嘅經紀人海就無復往日嘅壯觀了。
近排銀主拍賣會啲細價貨頗受歡迎，除舊樓外，居屋係頗受追捧嘅類別，接近市區嘅居屋，平到五、六十萬都有。月底就有個居屋銀主貨拍賣會，有十九單位，香港、將軍澳、新界西北同離島都有，面積由五百幾到八百幾呎，開價只係市值嘅五至六折。聽負責嘅環亞物業講，今次會先以第二市場形式叫賣，即係唔使補地價，唔到價就再以自由市場方式拍售。
蘭西
電郵地址：
