美食片當旺，略為紓緩市民勒緊褲頭過財赤日辰的折墮。兩套食片是《美味關係》和《五星級殺人夜》，《五》片較可觀，講紐約小意大利區一間其門如市的菜館，一晚之內接待了236個食客！眾生食相，夜覽無遺。英文原名DinnerRush，令人想起香港許多星都唔星吓的所謂名店，大鼻欺客，入座前已經點醒你：可否準八時半交番張枱出來！你請客你付鈔，晚飯直落卻似趕住投胎，還要收加一，食店愈來愈政府部門化！
看李登在《壹週刊》寫，《五》片導演開了十多家餐館，本身是行家，難怪場景逼真，廚師在七顛八倒的小廚房中拋鑊上碟似模似樣。而最好笑是主廚為了討好食評人，要犧牲男色跟口大如鑼、髮若掃把的醜怪婆娘食評家上床！而切題的殺人夜，被殺與殺手兩個角色，未到甜品上桌前，觀眾仍給吊着胃口。Finedining搭finedying，叫食客觀眾嗒落有味，飽肚而歸。
名廚為食評家的降級評價自殺，法國廚神Loiseau是人辦。人為財死，L經營三星食肆得法，搞到上市，雖然遭降星，他自殺當天，集團市值仍達730萬歐羅。國際評級既能殺死名廚，不禁叫你大發奇想，yummy，它能殺死累街坊闔家富貴的領導人嗎？