政府部門年中都會搞唔少春茗同聚餐，呢類應酬多數喺大酒店搞，都幾豪㗎。但財赤嚴重，政府嘅大管家行政署近日就出咗一份新指引，叫啲司長、局長同署長，以後唔好再搞呢類嘢，就算日常嘅官式應酬，亦要定限額，用人頭計午餐就每個客人唔准多過二百五蚊，晚餐就四百蚊樓下。
行政署重有新猷，就係連八十二蚊一本嘅政府電話簿都唔派畀官員，以後要上網睇電子電話簿；以前中高級官員凡放假搭飛機去旅行，可以預訂政府車載家人去機場，以後一律取消。行政署話以前冇計過呢啲開支究竟用咗幾多公帑。
唉，政府都使咗好多無謂錢，𠵱家一個「慳」字最緊要，如果唔係，遲早都俾人抽秤到呢啲開支，到時就難落台矣。
傳真︰2623-9278
電郵︰