恒指跌第5日，長和系跌得最傷，但太子李嘅電盈（008）則逆市而升，收4.875元，有10仙進帳，電盈熱門Call輪9637，低見2.1仙後，高收2.7仙，全日波幅好大，單日升幅8%。
9637今年11月到期，大把時間，溢價54.6%，槓桿率36.1倍。輪價細，波幅大，炒即市上落冇問題，揸耐啲則有問題。好多隻藍籌已見去年10月低位，電盈仍高於當時11%，公司好多撇帳，下周四派成績表，唔慌靚得去邊，股價向下走多過向上走，電盈Call輪博唔過。要博，揀Put輪勝算高啲，但對象得隻9652，6月中到期，現價57仙，負溢價0.5%，槓桿率1.7倍。揸9652，等於合法拋空正股，槓桿率大過直接拋空少少。
上周五美國油價又試升過，但油股冇乜點郁，中石油（857）只係升得1格。美伊局勢緊張，睇吓17號之前有乜新發展，呢幾日油價跌唔落，油股或有三朝兩日升勢，搵石油Call輪炒幾日，對象係中石油Call輪9361同9232。
9361今年6月到期，現價11.1仙，溢價0.7%，槓桿率14.6倍。9232遠期啲，11月夠鐘，現價14仙，溢價3.4%，槓桿率11.6倍。
章盛