問責高官又出事，阿松涉偷步買車避稅。阿虎唔覺得佢會貪區區5萬元，只要阿松在公布預算案當日，講明買咗架車準備畀新生女兒用，以及捐出所慳稅款以示清白，咁就乜事都冇，唔使搞到𠵱家千夫所指，誠信受到質疑。阿松智慧咁差勁，06-07年香港財政能否達致平衡，實在令人懷疑。
和黃（013）突然傳出多項不利消息，拖累股價勁跌近3.8%，收42.90元。不過，大戶托住中移動（941）與滙豐（005）沽期指，港股跌幅仍輕微，收報8861，跌45點。ｉ師傅話，由於滙豐月底將完成收購HouseholdInternational，需發行大量新股，若滙豐發行新股後，股價保持平穩，市值將大增，盈富（2800）呢類指數基金，須按比例吸納滙豐及沽出其他成份股，平衡投資組合。滙豐完成收購HI後股價會點樣走，實在唔易估，由於變數頗大，買賣宜小心，特別咪亂沽空。
麗豐（1125）停牌供股，同系嘅麗展（488）一度挫逾20%，但沽盤唔算太多，最後收報0.024元，跌7%。其實麗豐主要由麗國（191）持有，與麗展關係唔大，但噚日麗展急挫，反而麗國紋風不動。黑客話，可能股民見麗豐供股，恐防麗展都會一齊供，所以沽定貨先。不過，麗展即使可以成功將豐德麗（571）私有化，免還15億元債務，但麗展仍有巨大債務要重組，供股或大量發新股係遲早問題。
科浪國際（2336）噚日再挫26%，收報0.219元，較招股價0.50元累跌56%。Cookie話，噚日成交萎縮至105萬元，睇嚟要沽嘅已差唔多沽晒，不過未係撈底時候，因為聽聞炒家重未班到水令此股翻身。
阿虎