雖然巴塞隆拿今季聯賽成績衰到貼地，爭入前四希望渺茫，不過只要攞到今屆歐冠盃冠軍，下屆就重可以憑衞冕身份踢呢個盃。但係咁喎，佢哋有幾個球員異口同聲話今屆目標係爭取來屆歐洲足協盃參賽資格，講到咁洩氣，睇嚟連佢哋自己都對爭霸冇信心喎。
睇番紀錄，自從九六至九七年一屆之後，巴塞好耐都未試過踢唔到歐冠盃；不過佢哋冇信心爭歐冠盃冠軍又唔出奇嘅，始終今季佢哋喺首、次圈分組賽嘅對手又唔係特別強，考驗唔到真正實力；佢哋大將安歷基啱啱又受傷要唞幾個禮拜，出番嚟又唔知乜嘢光景。睇佢哋對爭標咁冇信心，禮拜二主場對利華古遜場毋須必勝嘅波唔慌決心強囉。
AC米蘭前晚主場贏唔到基爾禾，賽後有人問教練安察洛堤點解唔派李華度落場，佢竟然答話：「收起佢係等佢留力應付禮拜三對皇馬場波。」大佬呀，AC米蘭已經喺歐冠盃出線，之前又係你自己話暫時集中火力踢聯賽，呢個答案真係九唔搭八喎，你不如坦白啲認自己睇唔起基爾禾，輕敵之過重好啦。
前晚祖記贏烏甸場波，睇見烏甸後衞辛仙尼三十六歲人走上走落，臨完場飛身救空門，之後上前助攻幾乎頂入波，令我求大俠冇辦法唔向佢致敬。佢咁神勇，難怪今季已經入咗三球。呢場波執法嘅柏蘭卡趕烏甸嘅比斯出場，賽後唔少人話佢偏幫祖記。又難怪嘅，今季佢三次吹祖記比賽，祖記咁啱都作客贏波，少不免又惹起爭議。
今季愛華頓唔單止戰績好，平均每場主場入座人數超過三萬八，創佢哋歷來新高。今季係佢哋第一百年參加頂級聯賽，有咁好成績，當然未必同李鐵今季加盟有直接關係，但起碼肯定呢位國足猛將腳頭認真好。可惜唔係個個國足球員出國都好腳頭，好似邵佳一代表慕尼黑1860踢三場，隊波就輸兩場、和一場……。
ESPNSTARSports班製作人員好抵死，前晚直播皇蘇對艾拉維斯之前，照例播番艾拉維斯近期啲比賽片段，一到艾拉維斯失波就特登加「嘟」一聲，呢個特別安排似乎證明佢哋都唔睇好艾拉維斯。不過有眼光嘅唔止佢哋班製作人員，幫我哋推介呢場波嘅華度賽前高呼「皇蘇讓半?一濕濕碎」，果然言中。