恒指上周五出現十字星，美股當晚先跌後升，照數計港股應該有反彈，但和黃（013）英國3G業務要注資6.5億英鎊，加上拍檔可能縮沙唔注資，長實（001）及和黃噚日俾基金狂質，若非中移動（941）及時反彈，滙豐（005）回升一個位，港股唔止跌45點咁少，恒指收8861，向去年10月低位8772愈行愈近。
長實噚日大跌3.8%，收44.90元，成交急增至4.3億元，沽壓沉重。長實係繼中移動及新地（016）之後，第3隻跌穿去年10月熊市低位的大藍籌。和黃亦跌3.8%，收42.90元，成交更高達8.02億元，反映基金正在洗倉，現價42.90元與去年10月低位41.30元相去不遠，相信會成為第4隻跌穿去年10月低位的大藍籌。
港股5大藍籌中只剩下滙豐（005）未確認轉弱，恒指後市表現可思過半，有Put輪在手贏面大。
從較樂觀嘅角度睇，上述中移動、新地、長實只是輕微跌破去年10月底部，尚未能確認。若出現特大利好消息，或者有機會營造雙底回升，但可惜目前看不到任何迹象，若侯賽因肯自動落台，美伊避免開戰，是短期唯一令股市大幅反彈的因素。
新地明日公布中期業績，分析員估計頗參差，由增15%至跌10%，但股價表現則反映投資者睇淡新地前景，噚日再跌2.8%，收41元。新地跌至好淡關鍵位，雖然9RSI大超賣，但未完成尋底前，不宜博反彈。
趙飛雲