停咗牌一段時間嘅江山控股（295），一口氣公布多宗交易，但噚日復牌股價表現甚為肉酸，大跌13.24%，收0.118元，雖然成交金額只得189萬元，但買盤甚疏，沽盤則掛到一球球，睇落沽壓相當驚人。
江山今次停牌，公布以3400萬元，收購北京一項物業權益，發行新股支付。然後再將位於馬來西亞超級商場嘅六成半權益，以8200萬元出售，作價並較市價有溢價。另外又較市價有溢價，向買家發行已擴大股本1.2%新股，集資500萬元。
小初真係唔明，明明上面一連串交易對江山有着數，點解股價復牌表現咁差？經紀陳話，缸湖早有傳聞，話有位揸咗唔少江山股票嘅炒家，最近好似有多少水緊，被證券行Call孖展，所以股價先至表現咁差，其實早在停牌之前，江山股價已經開始腳軟軟，只係小初冇留意。
另外，小初早排提過泰興（389）有配股傳聞，但據可靠人士稱，公司並無咁嘅意圖。
慕容小初