愛情呢樣嘢真係好奇妙，好似電影《蜘蛛俠》男主角杜比麥奎爾（TobeyMaguire），早排先至話同著名音樂人QuincyJones個女Rashida訂婚，但舊年年尾杜比竟然同Rashida嘅好朋友JenniferMeyer擦出愛火花，佢哋重計劃今年夏天拉埋天窗㖭。
蜘蛛仔杜比上位係咪靠女友，我大口羅拉就唔係好清楚，不過佢睇中嘅女仔，背景同家底都有番咁上下，好似新歡Jennifer雖然只係時裝設計師RalphLauren嘅公關，算係一個圈外人，但佢老竇RonMeyer就好把炮，係環球電影公司嘅總裁！杜比同Jennifer結婚之後，電影事業發展點都會多啲着數。
我羅拉收到風，杜比已經叫定平日經常同佢一齊出去wet嘅老死里安納度狄卡比奧（LeonardoDiCaprio），喺婚禮入面做佢伴郎，而行內人士重爆料話：「其實杜比之前同Rashida訂婚嗰陣，已經認識Jennifer，佢哋正式行埋得幾個月，已經愛到癲咗！」