投資L突然打電話嚟，要左丁山同佢睇通勝擇日搬屋。咦，唔通由舊大屋搬去新豪宅，幫手刺激經濟？投資L話：「非也，個仔喺美國返咗嚟，兩公婆要搬出去住。」擇日話咁易啦，同佢傾多幾句，知道三藩市灣區經濟不景，大公司裁員不絕，L公子本係高級專業人士，受到衝擊，於是返嚟香港再圖後計。
以前講親裁員，少不免遮遮掩掩，留番幾分面，但現在冇一個家庭聽唔到呢種新聞，公開晒都唔使難為情咯。除咗投資L位公子外，老校友S哥位公子喺華爾街被裁，外滙老手A兄嘅仔本來甚得公司器重，獲派入大學讀碩士，亦在求學期間，收到公司通知："Yourservicesarenolongerrequired"，於是惟有離開紐約。
老友記啲下一代本來個個讀書了得，美國名校畢業，五年前係天之驕子，三年前有成為百萬富翁嘅美夢，估唔到一陣風打埋嚟，好多都要受暫時失業之苦。據投資L講，三藩市灣區、矽谷一帶，租金大跌，屋價再難維持，大有步入香港「八萬五」嘅可能，加州人試嘗負資產嘅滋味。據《金融時報》報道，Palm喺二○○○年在聖荷西（SanJose）以二億美元買入一幅珍貴地皮三十九畝，預備興建一間校園式嘅公司總部。今日夢醒咯，幅地只值六千萬美元，重要慢慢等買家出現㖭。我哋喺香港見過晒呢類個案，知道後果嚴重，如果美國其他地方亦有矽谷現象，我哋香港經濟肯定更曳。