馬時亨局長開到口話要推動香港債券市場發展，重用減稅呢招，道亨銀行主席黃鋼城即時「瞓身」支持。
黃主席噚日真係「瞓晒身」，上晝主持道亨/DBS廣安債券投資中心開幕，財政預算案發表唔夠一個禮拜，黃鋼城就成立呢個中心，你話快得幾緊要。下晝機場管理局宣布發行五億元零售債券，十一間銀行包銷，黃主席又親身上陣，成為咁多間行中最高級嘅代表。
簽紙儀式喺金鐘港麗酒店舉行，眾人簽完紙準備上台祝酒之際，突然「呯嘭」一聲，黃鋼城成個人向後跌咗落台，原來紅布幕後面乜嘢都冇，黃主席即時「瞓身」，要身邊各人扶番佢上來。好彩黃鋼城平日有做運動，冇咁易跌傷，如果唔係港麗酒店收收埋埋啲場租都唔夠賠湯藥費。
傳真︰2623-9278
電郵︰