財爺梁錦松偷步買車搞到滿城風雨，讀者向八方報料，話自由黨主席田北俊一月都買咗架超級跑車法拉利F360。八方向田大少求證，佢大大方方話舊年將揸咗六年嘅法拉利F355，以五十萬元賣番畀車行，車行老闆游說佢換架新款F360，但佢嫌架車要成二百二十萬太貴，唔肯制。
等到舊年年尾，車行有架貨尾，再問佢有冇興趣，田少開始心郁，但就唔鍾意紅色，結果車行願意免費幫佢噴做銀灰色，重減價三十萬，扣埋回收舊車，田少百四萬就揸咗架F360返屋企。不過佢話其實今次「除精有笨」：「架車係○二年款，我○三年一月先出車，第日賣出去，個價差好遠㗎！」田少話自己都係預算案公布當日先知會加稅，所以完全冇利益衝突問題。
佢重同八方講，想買架MiniCooper，揸慣超級跑車嘅田少，點解對車仔都有興趣？「上山頂條路多彎又窄，揸Mini同波子（保時捷）其實差唔多快㗎！」
除咗田少之外，周梁淑怡舊年九月都出咗架棗紅色嘅波子，田少同唐英年重教佢先喺歐洲試車，然後付運，但周梁聲明佢乜稅都交足晒：「今年我就一定唔會買㗎啦，咁貴稅攞命咩。」另一位立法會議員麥國風，舊年年底都換咗架二手平治，都算係避到加稅之苦。
傳真︰2623-9278
電郵︰