每年3月17日嘅St.Patrick'sDay（聖柏德烈日）對愛爾蘭人嘅含意，就好似中國人過農曆新年一樣咁隆重，佢哋呢日會將身邊所有物事，染成代表愛爾蘭嘅三葉草綠色，如果你都想感受一下呢份「綠色」歡娛氣氛，今年蘭桂坊WhiskeyPriest可能會畀到你。
記者：朱崇德 攝影：林栢鈞 ImageGirl：Irene
據小記打聽，當日會有好多喺香港居住嘅愛爾蘭酒客，於當日落嚟癲番幾晚，所以特別搵咗一間最正宗嘅愛爾蘭酒吧做訪問，而WhiskeyPriest就係香港較少見擁有純正愛爾蘭風味嘅酒吧！唔信？酒舖經理JonathanBrown本身就係一個土生土長嘅愛爾蘭人，所以由裝修陳設以至食物飲品，都係盡量跟足佢愛爾蘭老家做法，十足愛爾蘭地道風味！
所有品牌啤酒
「基本愛爾蘭現時最熱賣嘅三種啤酒—健力士、Kilkenny、Harp，呢度都全部有得賣！所以我哋有60幾款選擇，真係差唔多將成個愛爾蘭嘅酒搬晒返嚟咁滯！」至於為咗迎接咁重要嘅St.Patrick'sDay，由今個星期五至下星期一，WhiskeyPriest會特別引入賀節嘅酒水食品迎節！
當中首選嘅相信會係一款特意從愛爾蘭入口嘅GreenBeer（大$40、小$20），好似St.Patrick'sDay呢啲日子，愛爾蘭人喜歡飲呢隻天然果汁味啤酒，小記試飲後，覺得佢有喜力嗰種好清新、好順喉嘅感覺，不過酒精含量更低，加上有少少果香在啤酒散發而出，口感好清新！
如果想掯啲，可以試吓隻LeppeChaunsDelight（$25），主要由薄荷酒加新鮮即打忌廉所做成，酒精含量頗高，不過鮮忌廉會好輕易遮蓋酒味及薄荷味，唔知道好易中招！
正宗愛爾蘭家鄉菜
火烤愛爾蘭薯仔
呢款早餐係Jonathan由細食到大嘅，燒蘑菇、香腸、薯條、煙肉等，不過當中薯條最正，以愛爾蘭薯仔切條然後用大火烤！味極香甜，外脆內軟，佢話世間上只有愛爾蘭嘅薯仔先可以做到！
啤酒做脆皮
呢味炸魚最與別不同之處係佢個麵粉炸漿，竟然可以完全唔用水！改為用愛爾蘭健力士啤酒嚟開粉，過癮處當然係酒香四溢啦！而且黑啤的甘香味，同鮮魚肉的鮮甜味相輔相成，入口唔膩，份量足夠兩個人食。
愈燜愈入味
燜薯仔加香腸好似好簡單，但從Jonathan口中轉述，就完全唔係嗰回事。佢話以前愛爾蘭有一段被人侵佔的黑暗時期，當時大家都好窮，最平嘅愛爾蘭薯仔就成了主糧，用燜的方法，可以存放得好耐，而且愈燜愈入味。今次為咗保存十足愛爾蘭風味，亦特別用了愛爾蘭薯仔做，味道特別香甜，同一般薯仔味道好唔同。
WhiskeyPriest
地址：中環蘭桂坊13號
電話:28690099
營業時間：4:00pm-1:00am（星期二至四）、4:00pm-3:00am（星期五、六）、12:00nn-1:00am（星期日）
網址: