新晉男子組合Boy'Z噚日喺沙田新城市廣場為「樂善『糖』甜心行動」擔任甜心大使，義賣糖之餘重同fans簽名，吸引三百幾名fans捧場，由於fans反應熱烈，佢兩個義賣唔夠一分鐘，大班fans湧晒去台前，搞到場面失控，大會怕發生意外要即時腰斬活動。
事後Boy'Z嘅關智斌（Kenny）話佢一邊簽名一邊係咁俾人篤塊面，張致恆（Steven）就俾人捉住隻手唔放，要鬥力掹番隻手出嚟。但佢兩個事後就齊聲話雖然場面係幾恐怖，不過感覺都好興奮，因為證明受歡迎嘛。
問Boy'Z會唔會怕咗而唔再搞簽名會，佢哋經理人霍紋希聽到就搶住話：「唔搞簽名會，搞抱抱會囉，畀fans抱下。」而當佢兩個離開會場時，又再次引起混亂。Boy'Z俾四周嘅fans扯住件衫唔放，好彩最後都安全上車離開。
台灣天后蕭亞軒噚日喺台灣為化妝品Up2U做代言人，佢着咗一件低胸裝到場，非常性感。蕭亞軒喺台上又飛吻又拋媚眼，佢重同台下歌迷一齊跳舞，大受歡迎。問到蕭亞軒做代言人嘅酬勞，佢話：「都有成八位數字台幣，我對酬勞很滿意。」
關心妍噚日到屯門市廣場為輕盈版排毒美顏寶舉行簽名會，原來佢入行咁耐以嚟都係第一次搞簽名會，就連自己出碟嗰陣都未搞過，所以佢覺得今次廣告商宣傳好落本。而關心妍近日亦一口氣接了多個廣告，其中有洗頭水同政府廣告，關心妍話形象夠健康同正面就會吸引到廣告商，佢重話就算公開拍拖都唔會受影響。
蕭正楠噚日以西門子手機代言人身份到銅鑼灣世貿中心出席宣傳活動，做完活動之後佢又要匆匆趕去機場，搭機到泰國拍電影《咒樂園》，蕭正楠話之前蘇永康已經叮囑佢着泳褲嗰陣要小心啲，免得好似許志安咁被人影到着泳褲嘅相，不過蕭正楠就話冇有怕，佢話：「就算我着泳褲都唔會着白色，況且我會着潛水褲。」
台灣新晉組合可米小子噚日到黃埔海逸酒店親自煮早餐慰勞一班歌迷，不過唔知係唔係可米小子嘅工作太緊密，佢哋噚日遲到成個鐘先出現，可米小子一到場就即刻猛咁同人道歉，重解釋話其中一位成員安鈞璨患上感冒才連累其他成員遲到。而可米小子喺落廚嗰陣就出盡法寶冧fans，煮完之後重同fans互餵食物㖭。
