美股上周五先跌後升，港股之前亦已連跌4日，恒指唔見361點，短期或者有機會喘定。美伊局勢暫時支配港股甚至全球股市，未來兩個星期，係關鍵時刻，打嘅機會好大。如無必要或者唔想瞓唔着，最好暫作壁上觀。
3月期指低水136點，主要因為滙豐（005）同恒生（011）月底前除息，呢種情況對恒指Put輪有利，對恒指Call輪不利。恒指Put輪9587現價26仙，5月初夠鐘，表面上溢價1.7%，槓桿率8.6倍；但計埋恒指低水嘅因素，實際溢價半個百分點，咁低嘅溢價可以代表隻輪抵買，亦可以代表個市跌得差唔多。另方面，恒指Call輪9750，現價12.5仙，8月底到期，溢價5.8%，槓桿率21倍；隻輪夠鐘之時，多隻大藍籌除息，實際溢價幾乎8%，唔算得平，但亦可代表個市已經接近底部，隻輪先至可以有咁嘅溢價。
和黃（013）3G新聞多多，不利者多過有利，現價44.6元，有機會再向下移，吼住低見42元博止跌回升，收集啲Call輪博反彈，對象有兩件，即9666同9580。9666有3個幾月壽命，現價19仙，溢價10.8%，槓桿率23.5倍。9580則溢價低好多，缺點係交投疏好多。
章盛