周日去飲茶，金鐘茶樓一眾阿太，爭相傳閱《蘋果》，談論財爺梁錦松在加車稅前買車一事，你一言我一語，熱鬧非常。
L太太話好羨慕伏小姐嫁得金龜婿，更羨慕梁小姐，未出世已經有人買定架七十幾萬嘅靚車等佢坐；佢又唔信阿松，會為區區幾萬銀而行差踏錯，不過既然肯捐錢，亦係好事喎。
另一位L太就唔同意，佢話炒股票內幕交易被人查出，都要罰三倍，捐十萬算乜？何況重可以扣十六個巴仙稅呢。旁邊W小姐搭口，話內幕交易審裁處，係財政司委任嘅噃，你唔知咩？
大家講講吓，講到筆捐款應該點處置，由於阿松冇講明會捐畀邊個慈善機構，於是阿太們就七嘴八舌齊齊獻計。Ｌ太太建議，捐畀保良局，幫吓啲冇咁幸福嘅小朋友。Y太話最好捐畀爭取居港權組織，支持班冇證人士，等佢哋可以留港生仔；M太就話乜都唔好，最好就捐晒畀Mother'schoice（母親的抉擇）；大家聞言，噴到一枱都係茶。
傳真︰2623-9278
電郵︰