剛自美國返港的張天愛前晚和未婚夫羅素到尖沙嘴文化中心，欣賞《尼金斯基》歌舞劇，早前她參與NewYorkFashionWeek○三秋冬展，設計了一系列以「十二星座」為主題的冬裝。前晚她表示為了羅素樂做跟得夫人，因已厭倦了女強人生涯。
時裝設計師張天愛多年來致力發展具中國色彩的前衞服裝，早前她與香港六位設計師齊到美國紐約，在香港貿易發展局贊助下參與NewYorkFashionWeek○三秋冬展，舉行「re/visions」時裝展。
張天愛的設計打頭陣出場，她以十二星座為設計主題，一如以往般色調多姿多采，早前她接受電話訪問時說：「今次用西方特色嘅十二星座做服裝主題，以一個主色代表一個星座，好似山羊座我就用咗白色做服裝嘅主調，重好有結婚感覺㖭。而中國元素就喺布料、刺繡方面表現出嚟，今次呢批冬裝，我重加入咗一啲蒙古、西藏嘅地方色彩，好似包頭巾、用兔毛咁。」
有指美國和伊拉克的大戰一觸即發，張天愛曾在美國「九一一」事件發生時親歷險境，問她可會害怕開戰？她一副大無畏精神說：「唔怕，驚得幾多呀？就算真係開戰，都會有結束嘅一日，𠵱家美國充滿機會，我唔會怕㗎。」張天愛又表示已鎖定美國為事業發展基地，最近她在當地開設電影科技藝術公司，計劃為華納電影公司的新片任美術指導。
前晚張天愛剛由羅省返港，她與未婚夫羅素到尖沙嘴文化中心欣賞《尼金斯基》歌舞劇。她透露為陪羅素拍美國電視劇《黑帶》，在美國逗留了半年，她說：「我𠵱家做咗跟得夫人，做咗咁耐女強人都要停吓，希望幫吓佢喺電影方面嘅發展。荷李活嗰邊好鍾意佢呢類中年男人味重、又大隻嘅style，早排佢同AshleyJudd（艾絲莉茱爾）合作拍片㖭。」張天愛揚言現時學習做太太，但未急於結婚生兒育女。
